О́ńirde jobany tıimdi ilgeriletý maqsatynda 2020 jylǵa deıin arnaıy jospar-keste túzilgen bolatyn. 2019-2020 jyldary aýyl ajaryn keltirip, turmysyn túzeý baǵytyndaǵy 75 joba júzege asyryldy. Igilikti istiń nátıjesinde 15 aýyldyń 80 myńǵa jýyq turǵynynyń ómir súrý sapasy kóp-kórim jaqsardy. Eń aldymen baǵdarlama sheńberinde uzyndyǵy 120 shaqyrym kentishilik joldarǵa muqııat jóndeý jumystary júrgizilip, sýaǵarlar ornalastyryldy. Qazir bul aýyldardyń ishi jaınap tur. Zerendi aýdanynyń Vıktorovka jáne Bulandy aýdanynyń Kapıtonovka aýyldarynyń 2 myńnan astam turǵyny ortalyqtandyrylǵan aýyz sýmen qamtamasyz etildi. Qos aýyldyń turǵyndary uzaq ýaqyttan beri taza sýdy tutyna almaı, ókpe-nazdaryn aıtyp kelgen bolatyn. Tipti eldi mekenderden keıbir turǵyndardyń údere kóshýine sebep bolyp otyrǵan osy másele edi. Jańa jobanyń jaqsylyq sharapatymen kópten beri turǵyndardy mazalaǵan jaıt bir mezette sheshildi. Astrahanka aýylynda ınjenerlik jelileri bar qazandyq, Arshaly kentinde bir mezette 80-nen astam adamdy qabyldaıtyn basseıni bar dene shynyqtyrý-saýyqtyrý kesheni salyndy. Oǵan qosa, kóshelerdi jaryqtandyrýǵa kóńil bólindi. Basqa da birqatar nysanǵa jóndeý jumystary júrgizildi.
Bir aıta keterligi, qyrýar sharýa qolǵa alynǵan kezde 900-ge jýyq aýyl turǵyny ýaqytsha bolsa da jumysqa ornalasyp, tabys tapty. Joba júzege asyryla bastaǵannan beri 48 adamǵa turaqty jumys orny tabyldy. Eki qolǵa bir kúrek taba almaı otyratyn aýyl turǵyndary úshin osynyń ózi demeý.
Bıyl el táýelsizdiginiń mereıtoıy qarsańynda 27 eldi mekende 77 jobany júzege asyrýǵa bıýdjetten qarajat bólindi. Osy arada ótken jyldarmen salystyrǵanda qarajat kóleminiń edáýir qomaqty ekenin, jobalar men ıgilikke ıe bolatyn aýyldardyń sany kóbeıe túskenin aıta ketken jón. 14 joba boıynsha josparlanǵan jumys tolyq aıaqtaldy. Osy oraıda, oblys ortalyǵynyń irgesindegi Krasnoıar aýylyn ortalyqtandyrylǵan jylýmen jabdyqtaıtyn jeli salynyp, Mádenıet pen Egindikól aýyldaryndaǵy joldar ortasha jóndeýden ótkizildi. Jaqsy aýylyndaǵy mádenıet úıi kúrdeli jóndeýden ótkizilse, Lozovoe aýylyndaǵy jol jóndeldi. Novoselovka aýylynda da dál osyndaı jaǵymdy jańalyq bar.
Atbasar aýdanynyń Bastaý aýylynda jastar ortalyǵy, Jaqsy men Aqkól aýyldarynda dene shynyqtyrý-saýyqtyrý keshenderi, Býrabaı aýdanynyń Mádenıet aýylynda sport kesheniniń qurylysy júrgizilýde. Sondaı-aq Sandyqtaý aýdanynyń Balkashıno aýylyndaǵy stadıondy qaıta jóndeýde.
Joba aýyl turǵyndarynyń turmysynyń jaqsarýyna septigin tıgizip otyr. Eger osyndaı janashyrlyqpen barsha aýyl gúldense, el eńsesi elden erek bıikteı beretini sózsiz. Aýyl adamdary da memleket qamqorlyǵyn jan júrekterimen sezinip otyr.
