Prezıdent • 12 Qazan, 2021

Memleket basshysy AО́SShK keńesine jınalǵan delegasııa basshylarymen kezdesti

84 ret kórsetildi

Qazaqstan Prezıdenti Qasym-Jomart Toqaev AО́SShK Syrtqy ister mınıstrleri keńesiniń otyrysyna qatysyp jatqan delegasııa basshylarymen kezdesti, dep habarlaıdy Egemen.kz Aqordaǵa silteme jasap.

Qasym-Jomart Toqaev AО́SShK Syrtqy ister mınıstrleriniń 6-keńesiniń jumysyna qatysyp otyrǵan delegasııa basshylarymen kezdesý ótkizdi. Jıynǵa Bahreın, Belarýs, Úndistan, Qatar, Qyrǵyzstan, Mońǵolııa, Reseı, О́zbekstan, Túrikmenstan elderiniń syrtqy ister mınıstrleri, Izraıldiń týrızm mınıstri, sondaı-aq 5 halyqaralyq uıym men 15 memlekettiń dıplomatııalyq mıssııasynyń basshylary qatysty.

Memleket basshysy Táýelsizdiktiń alǵashqy jyldarynda Azııadaǵy ózara yqpaldastyq jáne senim sharalary jónindegi keńes ótkizýge Qazaqstannyń bastamashy bolǵanyn jáne Keńestiń geografııalyq aıasy men kún tártibiniń aýqymy keńeıgen qurlyqtyq platformaǵa aınalǵanyn atap ótti.

Prezıdenttiń pikirinshe, qazirgi tańda beıbitshilikti qoldaý, yntymaqtastyq ornatý jáne damý múddesi turǵysynan Azııa elderiniń ujymdyq kúsh-jigeri men danalyǵyn úılestirý úshin Keńestiń áleýeti zor. Qasym-Jomart Toqaev AО́SShK-ge múshe memleketterdiń bárine jáne Keńes hatshylyǵyna Qazaqstannyń tóraǵalyǵy aıasynda jasalǵan ózara tabysty is-qımyldary úshin rızashylyǵyn bildirdi.

«О́zderińizge málim, biz AО́SShK-ti tolyqqandy halyqaralyq uıymǵa aınaldyrýdyń strategııalyq maqsattaryna negizdelgen birqatar mańyzdy basymdyqtardy aıqyndadyq. Keńestiń halyqaralyq uıymǵa qajetti barlyq elementteri, atap aıtqanda negizgi qujattary, basqarýshy jáne jumys organdary, operatıvtik bıýdjeti men turaqty hatshylyǵy bar. Usynylyp otyrǵan transformasııa Azııanyń jahandyq isterdi retteýdegi jańa rólin aıqyn kórsetedi. Bul qadam Keńeske múshe memleketterdiń iri qurlyqtaǵy ortaq, biryńǵaı jáne tutas qaýipsizdiktiń arhıtektýrasyn qalyptastyrýǵa beıildi ekenin naqtylaıdy», dedi Qazaqstan Prezıdenti.

Sondaı-aq Qasym-Jomart Toqaev Qazaqstannyń Keńeske tóraǵalyǵyn shektegen COVID-19 indeti saldarynan týyndaǵan kedergiler týraly aıtty. Osyǵan baılanysty Memleket basshysy Keńeske múshe elderge kelesi bastamalardy qoldaýdy usyndy.

«Birinshiden, Aqsaqaldar keńesiniń basshysy laýazymyna AО́SShK-tiń negizin qalaýshy, Qazaqstannyń Tuńǵysh Prezıdenti Nursultan Nazarbaevtyń kandıdatýrasyn usyný – men úshin úlken mártebe. Ekinshiden, 2022-2024 jyldary AО́SShK tóraǵalyǵyna Qazaqstandy usynamyn. Elimizdiń kandıdatýrasy maquldanǵan jaǵdaıda Keńestiń ıgi mıssııasyn oryndaý úshin ujymdyq kúsh-jigerdi nyǵaıtý jolynda jańa mandatty paıdalanýǵa mindetteme alamyz», dedi Memleket basshysy.

Prezıdent óz sózinde qubylmaly strategııalyq jaǵdaıda Azııa qurlyǵy geosaıası kúrestiń basty alańyna aınalyp otyrǵanyn aıtty.

«Biryńǵaı jáne syndarly tásil usynyp, ózimizge zor jaýapkershilik pen mindet júktegen jaǵdaıda Azııa XXI ǵasyrdyń kóshbasshysy bolatynyna senimdimin. Bul rette, AО́SShK Azııadaǵy qaýipsizdiktiń, yntymaqtastyq men ortaq órkendeýdiń nysanyn qalyptastyra alatyn biryńǵaı forýmǵa aınalady degen úmittemiz», dedi Qasym-Jomart Toqaev.

Qazaqstan Prezıdenti aldaǵy jyldary AО́SShK mán berýge tıisti birqatar ózekti mindetterdi atap ótti. Qasym-Jomart Toqaevtyń aıtýynsha, Keńestiń negizgi mindeti ózara senimdi kúsheıtýge jáne janjaldardyń aldyn alýǵa baǵyttalǵan. Prezıdent senimdi kúsheıtý sharalarynyń jańartylǵan Katalogyn ázirleý jónindegi jumystyń sátti oryndalǵanyn atap ótti. Bul qujat epıdemıologııalyq qaýipsizdik, qoǵamdyq densaýlyq jáne farmasevtıka, aqparattyq tehnologııalar, terrorızmmen kúres syndy yntymaqtastyqtyń jańa salalaryn qamtıdy. Memleket basshysy Aýǵanstandaǵy jáne oǵan qatysty qazirgi qalyptasqan jaǵdaıdy ekinshi ózekti másele retinde atap ótti.

«Ortalyq Azııanyń bes memleketi Aýǵanstannyń qalypty jaǵdaıǵa oralýyna asa múddeli. Qazaqstannyń ustanymy aıqyn. Bizge Azııadaǵy Úlken oıyn emes, Úlken paıda qajet», dedi Prezıdent.

Memleket basshysynyń aıtýynsha, sozylmaly pandemııa jaǵdaıynda vaksınalardyń barynsha qoljetimdi bolýyn qamtamasyz etý qajet. Sondaı-aq Qazaqstan QazVac vaksınasy arqyly jalpyǵa ortaq densaýlyq saqtaý júıesine qomaqty úles qosýǵa nıetti ekenin aıtty. Memleket basshysy Keńestegi áriptesterin epıdemıologııalyq qaýipsizdik jónindegi jańa senim sharalary aıasynda ujymdyq kúsh-jigerdi jandandyrýǵa shaqyrdy. Qasym-Jomart Toqaev pandemııa Azııanyń álemdegi ornyn bekemdep alýyna jańa múmkindikter beretin syndarly sát bolýy da múmkin ekenin aıtty.

«Qazirdiń ózinde bizdiń aımaq ǵalamdyq tartylys kúshine aınaldy. Bunda álem halqynyń 60 paıyzy, tutynýshylyq qabileti bar ólshemmen alǵanda, álemdik IJО́ 40 paıyzy osynda shoǵyrlanǵan. Osy qurlyqta óte qýatty Eýrazııalyq ekonomıkalyq odaq, Ońtústik Shyǵys Azııa elderiniń qaýymdastyǵy, Azııa-Tynyq muhıty ekonomıkalyq yntymaqtastyǵy jáne Jan-jaqty aımaqtyq ekonomıkalyq áriptestik uıymdary jumys isteıdi. Azııadaǵy ózara yqpaldastyq jáne senim sharalary jónindegi keńeske múshe elder ekonomıkasynyń ornyqtylyǵyn nyǵaıtý úshin joǵaryda atalǵan uıymdarmen yntymaqtastyq máselesine erekshe kóńil bólgen jón dep oılaımyn», dedi Prezıdent.

Memleket basshysy Keńes árdaıym ekonomıkalyq ólshemin nyǵaıtý baǵytynda jumystar atqaryp jatqanyn atap ótti. Naqty aıtqanda, qarjylyq transaksııalardyń, qubyr jelileriniń jáne logıstıkalyq baǵdarlardyń qaýipsizdigin qamtamasyz etý boıynsha jańa sharalar qabyldanady. Sondaı-aq Prezıdent AО́SShK keńistiginde transporttyq dálizderdi odan ári damytýdyń mańyzdy ekenine toqtaldy.

«Bul rette kontınentaldy ınfraqurylymdyq jobalarǵa uzaqmerzimdi ınvestısııalar salýǵa úlken múmkindikter bar. Halyqaralyq qarjy ınstıtýttarynyń málimetine súıensek, bul sala 2030 jylǵa deıin jyl saıyn 1,7 trıllıon dollar qarajat salýdy qajet etedi», dedi Qasym-Jomart Toqaev.

Prezıdent klımattyń ózgerýine de toqtaldy. Onyń aıtýynsha, ǵalamdyq klımattyń ózgerýine baılanysty, ornyqty damý ıdeıasy Keńeske múshe memleketterdiń saıasatynan aıqyn kórinis tabýy kerek.

«Azııa-Tynyq muhıty aımaǵy klımattyń ártúrli qubylystaryna jıi ushyraıdy. Búkil álemdegi tabıǵı apattardyń 40 paıyzy osy aımaqta bolady jáne halqynyń 84 paıyzy zardap shegedi. Bul máseleler klımatqa baılanysty Parıj konferensııasynan keıingi SOR26 Sammıtiniń qarsańynda asa mańyzdy. Glazgodaǵy Kelisimderdiń sapaly oryndalýy adam shyǵynyna jáne turmys deńgeıiniń tómendeýine budan bylaı jol bermeý úshin qajet. Sizderdiń elderińiz osy ózekti máselelerdi ilgeriletýge yqpal etedi dep úmittenemiz», dedi Memleket basshysy.

Sonymen qatar Qasym-Jomart Toqaev Ortalyq Azııanyń, Taıaý Shyǵys pen Azııanyń ózge de aımaqtaryndaǵy azyq-túlik jáne sý qaýipsizdigine zardabyn tıgizetin aýa raıynyń ekstremaldy qubylystarynyń jıileýine alańdaýshylyq bildirdi.

«Qazaqstan azyq-túlik tasymaldaý boıynsha jahandyq tizimdegi belsendi el ári Azyq-túlik qaýipsizdigi jónindegi Islam uıymyn qurýǵa bastamashy bolǵan memleket retinde, atalǵan máselelerge AО́SShK-niń kún tártibinde basymdyq berilýge tıis dep sanaıdy. Bul bizdiń ınklıýzıvti damýymyz ben áleýmettik ıgiligimizdi, ásirese pandemııadan keıingi kezeńde qoldaý úshin mańyzdy»,  dedi Prezıdent.

Memleket basshysy geosaıası jaǵdaıdyń ýshyǵýyna baılanysty «tehnologııalyq temir shekaranyń» birte-birte aıqyndalyp kele jatqanyn atap ótti. Osyǵan oraı Prezıdent Qazaqstannyń AО́SShK-ge múshe eldermen tehnologııalyq seriktestikti tereńdetýge múddeli ekenin aıtty. Qasym-Jomart Toqaev AО́SShK Katologynyń jańa ári senimdi sharasy retinde IT salasynda yntymaqtastyq ornatýdyń máni zor ekenin jetkizdi. Memleket basshysy qarjy salasyndaǵy yntymaqtastyqty keńeıtý máselesine de arnaıy toqtaldy.

«Biz AО́SShK qarjy sammıtiniń qorytyndylaryn qoldaımyz. Búginde Qazaqstan eýrazııalyq keńistiktegi qarjy naryǵynda mańyzdy ról atqaratyn elge aınalyp keledi. Osy rette «Astana» halyqaralyq qarjy ortalyǵyn aıtýǵa bolady. Qazirgi ýaqytta bul Ortalyq álemdik ınstıtýttardyń ozyq tájirıbelerin ushtastyratyn jáne aǵylshyn quqyǵyna negizdelgen zamanaýı quraldardy paıdalanatyn qarqyndy qarjy alańyna aınaldy. AО́SShK boıynsha seriktesterimizdi AHQO-nyń múmkindikterin belsendi paıdalanýǵa shaqyramyn», dedi Memleket basshysy.

Prezıdent sóziniń sońynda aıtqan usynystarynyń bári ortaq maqsatqa qol jetkizýge, meılinshe qaýipsiz, ornyqty ári órkendegen Azııa qalyptastyrýǵa baǵyttalǵanyn aıtty. Osy rette, Qasym-Jomart Toqaev kelesi jyly Qazaqstanda ótetin AО́SShK-niń 6-sammıtiniń mańyzdylyǵyna erekshe mán berdi. Prezıdenttiń aıtýynsha, sammıt «Jańa Álemdegi Jańa Azııa» baǵdaryn aıqyndaýǵa arnalǵan. Memleket basshysy atalǵan is-sharaǵa zor mán beretinin atap ótip, Keńeske múshe elderdiń basshylaryn onyń jumysyna belsendi atsalysýǵa shaqyrdy.

Sońǵy jańalyqtar

Qyrǵyzdyń óńindeı...

О́ner • Búgin, 08:35

Áleýmettik jobalardyń áleýeti

Úkimet • Búgin, 00:01

Abyroıly Aǵzam aqsaqal

Aýyl • Keshe

Taǵy da tarıf týraly

Aımaqtar • Keshe

Qoldan shapqan qobyz

Rýhanııat • Keshe

Kúlánda apa

Eń qysqa áńgime • Keshe

Alash at tarıhy

Qoǵam • Keshe

Bir óleńniń tarıhy

Ádebıet • Keshe

Sultanmahmut jeńisi

Ádebıet • Keshe

Dala men daryn

Tarıh • Keshe

Uqsas jańalyqtar