Qyrymbek Kósherbaev Tursyn Jurtbaıdyń jazýshylyq, shyǵarmashylyq jolyna toqtalyp, onyń ǵalym retinde atqarǵan aýqymdy jumysyn atap ótti. Memlekettik hatshy ǵalymnyń eki tomdyq «Dýlyǵa» tarıhı-tanymdyq kitabynyń berer taǵylymy mol ekenin, Uly Abaı, danyshpan Muhtar týraly zertteýlerindegi oılarynyń ómirsheńdigin aıtyp, «Beıýaq», «Besigińdi túze!..», «Talqy», «Mýhtar Omarhanovıch Aýezov», «Qunanbaı», «Súre sóz» eńbekteriniń ǵylymı qundylyǵy asa joǵary dep baǵa berdi.
Al 1922-1937 jyldar aralyǵyndaǵy, 50-jyldardaǵy ult zııalylaryn qýdalaý, qýǵyn-súrginge ushyratý týraly, «Alash» partııasy men Alashorda úkimeti basshylary men músheleriniń ústinen júrgizilgen tergeý isteriniń negizinde «Uranym – Alash!..» atty úsh tomdyq zerdeli zertteýiniń shyǵýy rýhanı dúnıemizge úlken serpilis ákeldi.
Halyqaralyq ǵylymı-tájirıbelik konferensııada Memlekettik hatshy tarıhqa qatysty birqatar oıyn ortaǵa salyp, usynystarymen bólisti. Sonyń negizinde tarıhı ilim-bilimniń birjaqty kózqarastarynan aryla otyryp, ótken tarıhymyzdyń shynaıy beınesin jasaýdy, ejelgi jáne orta ǵasyrlar tarıhyna basa nazar aýdarýdy usyndy. Budan bólek Keńes dáýirindegi Qazaqstan tarıhyn qaıta paıymdaýdyń, elimizdiń osy zamanǵy tarıhynyń tolǵaqty máselelerin zertteýdi kúsheıtýdiń, qazaq dıasporalarynyń tarıhyn zerdeleýdiń mańyzdy ekenine toqtaldy.
Konferensııaǵa QR Prezıdentiniń keńesshisi Baýyrjan Omarov, QR Prezıdentiniń baspasóz-hatshysy Berik Ýálı, Bilim jáne ǵylym mınıstri Ashat Aımaǵambetov, Nur-Sultan qalasynyń ákimi Altaı Kólginov jáne elimizdiń belgili ǵalymdary qatysty.
