Aımaqtar • 18 Qazan, 2021

Sheteldikterge zańsyz eńbek vızasyn rásimdegender anyqtaldy

120 ret kórsetildi

Almatyda sheteldik jumysshylarǵa zańsyz eńbek vızasyn berýmen aınalysatyn birneshe JShS anyqtaldy. Bul týraly Ishki ister mınıstrliginiń resmı ókili Nurdildá Oraz málimdedi, dep habarlaıdy Egemen.kz.

«Almatyda sheteldikterge zańsyz eńbek vızasyn berýmen aınalysatyn jańa nysandardy anyqtadyq. Bir páterde tirkelgen, eshqandaı qyzmetpen aınalyspaǵan, salyq pen bıýdjetke tólem tólemegen jeti JShS ustaldy. Alaıda, osy JShS arqyly sheteldikterge 16 eńbek vızasy berilgen. Bul fakt boıynsha IIM kóshi-qon qyzmetiniń sotqa deıingi tergeýi bastaldy», dedi Oraz IIM brıfınginde.

Ol 11 qazannan bastap elimizde «Zańsyz-kordon» aımaqtyq operasııasynyń ekinshi kezeńi júrgizilip jatqanyn aıtty. Polısııa sheteldikterdiń eńbegin zańsyz paıdalanatyn jumys berýshilerdi, sheteldikter turatyn turǵyn úı sektorlaryn, qurylys alańdaryn, bazarlardy tekseredi.

«Kóshi-qon zańnamasynyń 12 myńnan astam zań buzýshylyqtary anyqtaldy. Olardyń 9 myńǵa jýyǵy sheteldikterdiń elde bolý merzimin buzýyna qatysty bolsa, 3300-i sheteldikterdiń zańsyz jumysqa ornalasýyna baılanysty.

535 jumys berýshi sheteldikterdiń jumys kúshin zańsyz paıdalanǵany úshin ákimshilik jaýapkershilikke tartyldy. Kóshi-qon zańnamasyn buzýshylardy elden shyǵarý týraly 792 sot sheshimi shyǵaryldy», dep tolyqtyrdy Nurdildá Oraz.

Uqsas jańalyqtar