Hokkeı • 18 Qazan, 2021

Dıstiń jalaqysy – 100 mıllıon rýbl

Qurlyqtyq hokkeı lıgasynda (QHL) óner kórsetip júrgender oıynshylar arasynda eń kóp jalaqy alatyndardyń tizimi jarııalandy. Bul kóshti Nur-Sultannyń «Barys» klýbynyń kapıtany Darren Dıs bastap tur.

Ǵalym SÚLEIMEN

28 jastaǵy kanadalyq hokkeıshi 2017 jyly «Barystyń» jeıdesin kıdi. Arada bir jyldan asa ýaqyt ótken soń ol Qazaqstannyń ulttyq quramasynyń sapynda oınaýǵa nıet bildirdi. Bizdiń elge kelgen bette Dıs birden komandanyń serkesine aınalyp, óreli ónerimen jergilikti jankúıerlerdiń júregin jaýlady. Sol sebepti de «Barys Arenaǵa» jınalǵan kórermen ony «Dáýren» dep erkeletip ataýdy ádetke aınaldyrdy. Qazirgi kezde túrli bonýstar men syıaqylardy eseptemegende, Dıs jylyna 100 mıllıon rýbl (shamamen

597 337 300 teńge) kóleminde jalaqy alady.

Máskeýdiń «Dınamo» klýbynyń shabýylshysy Vadım Shıpachev ekinshi orynda. 34 jastaǵy Reseıdiń soltústik-batysyndaǵy Cherepoves qalasynyń týmasy bul kúnderi Máskeýdiń «Dınamosynyń» basty juldyzyna aınalyp otyr. Olımpııa oıyndarynyń jeńimpazy jáne álem chempıony degen dardaı ataqtary bar surmergen ár jylda 95 mıllıon rýbldi shytyrlatyp turyp sanap, óz ámııanyna salýda.

Sýomı eliniń ókili Teemý Hartıkaınen men reseılik Maksım Shalýnov úshinshi jáne tórtinshi oryndardy ózara bólisýde. 31 jastaǵy Hartıkaınen Fınlıandııanyń ulttyq quramasy men Ýfanyń «Salavat Iýlaev» klýby sapynda óner kórsetýde. 28 jastaǵy Shalýnov Iаroslavldiń «Lokomotıviniń» namysyn qorǵaýda. Ekeýi de KHL-daǵy eń úzdik shabýylshylardyń sanatynda. Soǵan sáıkes olardyń jalaqylary da óte joǵary. Árqaısy jyl saıyn 90 mıllıon rýbl alyp júr.

Sondaı-aq «Salavat Iýlaevtyń» qos sańlaǵy – danııalyq Fılıp Larsen men fınlıandııalyq Iýha Metsola 80 mıllıonnan alsa, amerıkalyq Rıd Býshe («Lokomotıv»), fransııalyq Stefan da Kosta («Avtomobılıst»), reseılik Alekseı Marchenko («Lokomotıv») men Vladımır Tkachev («Traktor»), kanadalyq Eddı Paskýale men shvesııalyq Andre Peterssonnyń («Lokomotıv») jalaqylary 75 mıllıon rýbldiń shamasynda.

Kúnniń mańyzdy jáne ózekti jańalyqtaryn «Egemen Qazaqstan» telegram kanalynan oqyńyz