Aımaqtar • 19 Qazan, 2021

Qamba toldy astyqqa...

70 ret kórsetildi

Myńǵyrtyp mal baqsań da, gektarlap egin ekseń de Shyǵystyń jeri qolaıly. Búginde jalpy kólemi 1 384 gektar egistik alqaby orylyp, qambaǵa tógildi. Bul kórsetkish ótken jylmen salystyrǵanda, 17 myń gektarǵa artyq. Alqaptyń kólemine qaraı, túsim de jaman emes. Egin pise sala tehnıka tizgindegen sharýalar áli tynym tappaǵan.

Samar óńirinde teńizdeı tolqyǵan altyn alqapty tilip kele jatqan qos kombaındy kórip, kúre joldan dala jolyna shyqtyq. Oıymyz – dán egip, jer emgen sharýalarmen áńgimeleskimiz kelgen. Jazdaı jaýyn-shashynnyń az túsýi astyq qoryna áseri bolmady ma degendeı suraqtar da oıda tur.

«Esil» kombaıny jaıqalǵan egindi qylǵyta jutyp kelip, aldymyzǵa toq­tady. Alpysty alqymdap qalǵan «Qalı­sat­taruly» sharýa qojalyǵynyń jetekshisi Samarhan Jotabaev kombaınnan qarǵyp tústi. О́zi basshy bolǵanymen, qara ju­mys­pen bite qaınasyp ketken. Qyrman ba­synda erte kóktemnen qara kúzge deıin jumysshylarmen birge. Aldyna qara túsir­meı­tin tájirıbeli kombaınshy ekenin de jer­lesteri jyr qylyp aıtady.

– Sekseninshi jyldardan beri aýyr teh­nıkalardyń rólinde kele jatyrmyn. Kom­baın ómirimniń bir bólshegi sekildi. Al qojalyqta jalpy 25 adam jumys isteıdi. Kúz ben kóktemde qosymsha jumysshylar tartylýy múmkin. Bıyl túsim jaman emes. Bir sýyq túsken soń kúnbaǵysty orýǵa kirisemiz, – deıdi S.Jotabaev.

Ol sondaı-aq 1, 2, 3 reprodýksııaly tuqym óndirýmen de aınalysyp keledi. Qorynda bıdaıdyń «Omskaıa-18», «Altaı 325», kúnbaǵystyń «Zarıa», arpanyń «Skakýn» degen suryptary bar. Saralap qara­saq, óńirde malmen, jermen aınalysa­tyn sharýa qojalyqtary kóp. Biraq ju­mysshylardyń áleýmettik jaǵ­da­ıyn qan­­shalyqty jasaı alady? Al «Qa­lı­sat­taruly» qojalyǵynda jumys­shy­­lar­dyń eńbekterine qaraı laıyqty jala­qy­­larymen qatar, ozyq shyqqandaryna baspana, kólik beriletinin de aıta ketken jón. Jalpy, qojalyq jetekshisi jumysshylardyń áleý­met­tik jaǵdaıyn únemi nazarynda ustap otyrady. Bul ju­mysshy mamandaryna degen qurmeti. Áıtpese, jyl ótken saıyn traktorshy, kombaınshy, tokar, agronom syndy mamandyqtar azaıyp barady. Mektep bitirgen túlekterdiń basym kópshiligi jyly jerde, basshylyq orynda otyrýdy maqsat etedi. Dese de eńbek mamandarynyń tabysy eshkimnen kem emes.

Samarhan Jotabaev aýdannyń jáne oblystyń áleýmettik-ekonomıkalyq damýyna úlken úles qosyp keledi. Eńbegi de eleýsiz emes. Birneshe ret memlekettik nag­radalarmen jáne alǵystarmen mara­pattalǵan.

Oblystyń Altaı, Glýbokoe, Shemo­naı­ha, Borodýlıha, Ulan aýdandary da túgin tartsań maıy shyǵatyndaı, shu­raı­ly óńirler. Jaz qurǵaq bolǵanymen, egin shyqpady degendi estimedik. Jalpy alǵanda, bıyl dándi daqyldar 599 myń gektarǵa, maıly daqyldar 486 myń gek­tar­ǵa egildi. Kartoptyń ózi 18 myń gek­tardy alyp jatty. Dándi-burshaqty da­qyl­darǵa oraq shildeniń sońynda túse bas­taǵan. Oblystyq aýyl sharýashylyǵy mamandarynyń derekterine súıensek, dándi jáne dándi-burshaqty daqyldardyń ortasha túsimi gektaryna 14,48 sentnerden. Bul kórsetkish ótken jylǵy deńgeıden 0,48 sentnerge joǵary.

Jyl saıyn tehnıkalar da jańartylyp jatyr. Oblys sharýashylyqtarynda uzyn sany 3 581 astyq jınaıtyn kombaın bar eken. Onyń 1 202-si zamanaýı tehnıkalar. Iаǵnı ónimdiligi joǵary, bireýiniń ózi ónimdiligi jaǵynan «Nıva» nemese «Enıseı» markaly 2-3 kombaınǵa para par. Dızelge de únemdi. Dızel demekshi, oraq maýsymynda Energetıka mınıstrligi oblys sharýalaryna tonnasy 189 myń teńgeden 30 myń tonna dızel otynyn bóldi. Sonymen qatar jem-shóp daıyndaý úshin 4,8 myń tonna arzandatylǵan dızel otyny bólindi. Jınalǵan ónimdi ysyrap etip almaı óńdeý úshin táýligine 12 myń tonna astyq keptiretin 90 keptirgish jumys istep tur. Odan basqa 300 mehanıkalandyrylǵan keptirgish bar. Oblysta aýyl sharýashylyǵy daqyldarynyń ónimin saqtaýmen 8 lısen­zııalanǵan elevator aınalysady. Lısen­zııa­lan­ǵan astyq qabyldaý pýnktteri 472 myń tonna astyqqa deıin saqtaýǵa qaýqarly.

Túsingenimiz, janar-jaǵarmaı naryq­ta­ǵy baǵadan arzanǵa bosatyldy. Astyq qory byl­tyrǵydan 1,2 paıyzǵa artyq. Ele­va­tor­lar da jetkilikti. Alaıda nan baǵasy 135 teńgege qymbattaǵan.

 

Sońǵy jańalyqtar

Qyrǵyzstanda tynyshtyq kúni ornady

Álem • Búgin, 12:30

Koronavırýstyń jańa shtammyna ataý berildi

Koronavırýs • Búgin, 11:37

Vaksına saldyrǵandar sany artty

Koronavırýs • Búgin, 09:35

Pavlodar oblylysy «qyzyl» aımaqtan shyqty

Koronavırýs • Búgin, 09:16

905 adamnan koronavırýs anyqtaldy

Koronavırýs • Búgin, 09:08

Bek pen Aıdos jattyǵýǵa kiristi

Kásipqoı boks • Keshe

Uqsas jańalyqtar