«Árıne, bala ólimi – bul úlken tragedııa. Bul jaǵdaı belgili bolǵan soń, birden Balalardyń quqyqtaryn qorǵaý komıtetiniń ókilderi Túrkistan oblysyna attandy. Búgingi kúni olar sol jaqta jumys istep jatyr. Bul fakti boıynsha tıisti organdar tergeý sharalaryn júrgizýde. Nátıjesi anyq bolǵanda taǵy habarlaımyz», dep jaýap berdi vıse-mınıstr OKQ-da.
Sholpan Karınova oqýshydan aqsha bopsalaý máselesi boıynsha aldyn ala boljam jasamaýǵa shaqyrdy.
«Meniń oıymsha, qorytyndy jasaýǵa asyǵýdyń qajeti joq. Munda tıisti organdar jumystaryn aıaqtaýy kerek. Sonda ǵana sheshim shyǵarylady. Al aqsha jınaý máselesine keler bolsaq, BǴM muny únemi aıtyp keledi. Ata-analar arasynda bolsyn, jalpy mekteptiń ishinde aqsha jınalmaýy tıis. Ár faktini jeke qarastyryp, eń qatań sharalar qabyldanady», dep tolyqtyrdy Karınova.
Eske sala keteıik, ótken aptada Túrkistanda 5-synyp oqýshysy kóz jumǵan bolatyn. Qaza tapqan oqýshynyń ájesiniń aıtýynsha, ony aqsha taýyp bere almaǵany úshin synyptasy mekteptiń dárethanasynda soqqyǵa jyqqan. Al dárigerler balanyń basynda aýyr jaraqat bolǵanyn aıtady.
