Sońǵy aptada alǵashqy sáıkes merzimmen salystyrǵanda dertke shaldyǵý deńgeıi 1,6 paıyzǵa ósken. Dert dendegen derekterdi saraptasańyz, qazan aıynda qaýip-qaterdiń burynǵydan áldeqaıda kóbeıe túskenin aıqyn ańǵarýǵa bolady. Ásirese, oblys ortalyǵynda, Býrabaı, Arshaly, Bulandy aýdandary men Stepnogorsk qalasynda indet órship tur. О́tken táýlikte ınfeksııa juqtyrǵan 110 adam anyqtaldy. Olardyń 94-i sımptomdy bolsa, 16-y sımptomsyz. Qazir 474 adam aýrýhanada emdelip jatsa, jansaqtaý bólimshesine 43 naýqas tústi.
Jańa oqý jylynan bastap bilim oshaqtaryndaǵy jaǵdaı da kúrdeli. Onda 584 jaǵdaı tirkelse, 173-i mektepten tys jerde indetke ilikkender. Saqtyq sharalary buljytpaı oryndalyp otyr degenimen ótken táýlikte ǵana 14 oqýshy dert sheńgeline ilikken. 48 bilim berý uıymynda koronavırýs ınfeksııasynyń tirkelýine baılanysty 65 synyp qashyqtan oqytýǵa kóshirildi. Muǵalimder arasynda da aýyrǵandar sany kúnnen-kúnge ósip keledi. Jańa oqý jylynan beri 142 muǵalim aýrýǵa shaldyqqan. Mektep jasyna deıingi balalardyń aýrýǵa shaldyǵýy alańdaýshylyq týǵyzýda. Kún saıyn kishkentaı balalardyń aýrý derekteri shyǵyp jatyr.
Bizdiń paıymdaýymyzsha, indettiń etek alýy ózimizdiń beıqamdyǵymyzdan. Qazir daýasyz derttiń qaýpine eldiń eti úırenip ketken syńaıly. Tipti, indetti elemeı as berý, toı jasaý, týǵan kúnderin atap ótý tyıylmaı otyr. Jyl basynan beri monıtorıngtik toptar 28 944 nysanda saqtyq sharalarynyń saqtalý deńgeıi qanshalyqty ekenin teksergen. Tekseris nátıjesinde 624 talap buzýshylyq anyqtalǵan. Osy aıda 468 nysan tekserilip, karantındik sharalardy buzýdyń 17 faktisi belgili bolyp otyr. Bul anyqtalǵandary ǵana, áıtpese oblys ortalyǵyndaǵy meıramhanalar men dámhanalardyń aldynda júzdegen kóliktiń qańtarylyp turǵanyn kóz kórip júr.
Shaǵyn jáne orta bızneske, sondaı-aq jeke tulǵalarǵa qatysty karantın sharalaryn buzǵany úshin ákimshilik sharalar qoldanylýda. Jalpy, kólemi 864 mln teńge bolatyn 654 aıyppul salynyp, 16 materıal ákimshilik sottyń qaraýyna jiberilgen. 27 qyrkúıekten bastap qaýipsiz mártebesi bar kelýshilerdiń qatysýymen otbasylyq saltanatty sharalar, úılený toılary men mereıtoılardy ótkizýge ruqsat berilgen bolatyn. Árıne, shekteý bar. Biraq sonyń ózinde de osy jeńildik dert deńgeıiniń azaımaýyna sebep bolyp turǵan syńaıly. Shyntýaıtynda kásibiniń jaıyn oılaǵan meıramhana men dámhana qojaıyndary vedomstvolyq komıssııa qabyldaǵan sheshimdi oryndaı bermeıdi. Sózimiz dáleldi bolýy úshin mysal keltire ketelik. Máselen ótken demalys kúnderi Selınograd aýdanynyń monıtorıngtik toby adam sany ruqsat etilgen mólsherden asqan úsh oqıǵany anyqtaǵan. Qosshy qalasyndaǵy «Arýjan plaza» meıramhanasynda 160 adam qatysqan úılený toıy ótkizilipti. «Baıandy» meıramhanasynda 150 adammen toı uıymdastyrý da tártip buzýshylyq. Árqıly banketter ótkizý kezinde de Ashyq platformasyna qatysýshylar jumys kestesin buzyp otyr. Qoıandy aýylyndaǵy Ashyq tobyna kirmeıtin «Alash» meıramhanasynda júzden astam adamnyń qatysýymen toı ótken. Atbasardaǵy «Darına» meıramhanasynda 70 qonaqtyń qatysýymen týǵan kún keshi uıymdastyrylǵan. Mundaı mysaldardy kóptep keltirýge bolady. Osydan shyǵatyn qorytyndy, adamdardyń ózderi tónip turǵan qaterdi elemeı, beıqamdyq tanytýda.
Karantın talaptaryn buzýshylardyń ashy ishekteı shubatylǵan tizimin Kókshetaý qalasy men Býrabaı jáne Astrahan aýdandaryndaǵy betperde kııý talaby saqtalmaǵan nysandarmen tolyqtyrýǵa bolady. Qazir óńir turǵyndaryna barlyq shekteý sharalaryn buljytpaı oryndaý usynylyp otyr. Tipti otbasylarynda da shaǵyn shara ótkizýge tyıym salynǵan.
«Shyǵasyǵa ıesi basshy» degendeı, shyrǵalańǵa túsirip otyrǵan shytyrmannyń túıinin túıip otyrǵan ózimiz. Basqa túsken beınetti basqadan emes, ózimizden kórip, tyıylsaq ta bolar edi. Qaraqan bastyń qamy úshin ǵana emes, qara ormandaı qalyń eldiń amandyq-saýlyǵy úshin.
