Qylmysqa qarsy kúresti tıimdi uıymdastyrý qajet

Taıaýda Ishki ister mınıstri Erlan Turǵym­baev­tyń jetekshiligimen ótken alqa otyrysynda Prezıdent Qasym-Jomart Toqaevtyń tapsyrmalarynyń oryn­­dalý barysy jáne ishki ister organdarynyń osy jyldyń 9 aıyndaǵy jedel-qyzmettik jumysynyń qory­­tyn­dylary týraly baıandaldy. Osy jıynda belgili bolǵandaı, qabyl­danǵan sharalardyń nátıjesinde aýyr qyl­mys­tar, densaýlyqqa aýyr zııan keltirý, qaraqshylyq, tonaý, zorlaý, urlyq, mal urlyǵy, buzaqylyq sanynyń azaıýyna qol jetkizildi. Oń úrdisterdiń ishinde kámeletke tol­maǵandar arasyndaǵy quqyq buzý­shylyqtar 30%-ǵa, mas kúıinde quqyq buzýshylyq jasaý 21%-ǵa, qoǵamdyq oryndar men kóshelerde oryn alǵan quqyq buzýshylyqtardyń úshten birge azaıýyn atap ótý qajet. Bir­qa­tar óńir­de otbasylyq-turmys­tyq qylmys aıtar­lyqtaı tómendegen.

Sonymen qatar mınıstr ınternet-alaıaqtyq sanynyń ósýine nazar aýdardy. Azamattardyń senimderin paıdalana otyryp, qylmyskerler aldaýdyń ártúrli tásilderin qoldanady. Kó­bi­nese urlanǵan qarajat shetelge elek­tron­dy tólem júıeleri arqyly shy­ǵa­rylady. «Osyǵan baılanysty IIM TMD-ǵa qaty­s­ýshy memleketterdiń Ishki is­ter mınıstrleri keńesiniń oty­ry­syn­da elden tys, shektes memleketter aýmaǵynda jasalatyn osyndaı qyl­mys­­tarǵa qarsy is-qımyl tetigin bir­lesip ázirleý týraly bastama jasady. Alaıaqtyq is-áreketter men túrli qarjy pıramıdalarynyń qyzmetiniń kesirinen azamattarǵa aıtarlyqtaı ma­­terıaldyq zııan keltiriledi, bul shu­ǵyl sharalardy talap etedi», dedi vedomstvo basshysy.

Esirtki qylmysyna qarsy kúres jónin­degi jumys jeke qaraldy. Esirt­ki quraldaryn ınternet arqyly jarna­ma­laý jáne taratý úshin jaýap­ker­shi­lik kúsheıtildi. Zańsyz aınalymǵa jedel den qoıý jáne ony boldyrmaý úshin esirtkiniń jańa túrlerine ty­ıym salynady, esirtkiniń qyl­mys­tyq jaýaptylyq týyndaıtyn «krı­mı­nal­dyq salmaǵy» tómendetiledi.

Alqa otyrysynda qaralǵan taǵy bir ózekti másele jol qaýip­siz­digin qam­tamasyz etý boldy. Jol apat­ta­rynyń negizgi sebebi – júr­gizý­shi­lerdiń jol qaýipsizdigin saqta­ma­ýy, olardyń kinásinen árbir besinshi JKO jyldamdyqty arttyrýǵa baılanysty, árbir segizinshi JKO joldyń qarsy qozǵalys jolaǵyna shyǵý nemese jol qıylystarynan ótý sebebi bo­­ıynsha jasalady. Sondaı-aq jaıaý júrginshilerdiń tártibi men qaýipsizdigi máselesine erekshe nazar aýdarý qajet. Sebebi jalpy JKO-nyń, onyń ishinde ólimmen aıaqtalǵan jáne kóp adam jaraqattanǵan JKO sanynyń ósýi.

Osyǵan baılanysty E.Turǵymbaev joldardaǵy qaýipsizdikti baqylaýdy kúsheıtýdi, kóshe-jol jelisine tekserý júrgizýdi, jol-paıdalaný qyz­met­teriniń buzýshylyqtardy joıýdy uıym­dastyrýdy, jol ınfra­qury­ly­my­na jaýapty memlekettik organdarmen ózara is-qımyldy jandandyrýdy tapsyrdy. Sonymen qatar mınıstr beınebaqylaý júıesin keńeıtý, jol qozǵalysy erejelerin buzýdy avtomatty túrde tirkeý júıesin belsendi qoldaný jáne atalǵan buzýshylyqtar úshin jazalaýdyń bultartpastyǵy qa­ǵıdatyn basym baǵyt dep atady.

Bi­rinshi kezektegi mindetter – jeke qu­ram arasynda zańdylyq pen tártipti saqtaý, kadr saıasatyn jetildirý, qoǵam men halyqtyń seniminen shyǵatyn polıseıdiń «jańa formatyn» qurý.