Boks • 21 Qazan, 2021

Aqsha emes, abyroı qymbat

269 ret kórsetildi

Japonııa astanasy Tokıo qalasynda ótken Jazǵy Olımpıada oıyndarynan janarymen jer shuqyp qaıtqan boksshylarymyzdy jankúıerler jerden alyp jerge salǵany belgili. Nátıjesinde bas bapker aýysty. Eki qola júldemen eńsesi túsip qaıtqan bylǵary qolǵap sheberleri úshin Serbııa astanasy Belgrad qalasynda jalaýy jelbireıtin álem chempıonaty jańa múmkindik syılap otyr.

Birinshiden, boksshylarymyz osy álem chempıonatynda 13 salmaq dárejesinde baq synaıdy. Ekinshiden, áýesqoı boksqa ańsary aýǵan jekelegen mamandar men fanattar 69 kılogramm salmaq dárejesinde judyryqtasqan Abylaıhan Júsipovtyń ornyna lısenzııalyq synǵa Aslanbek Shymbergenov barýy kerek edi degendi alǵa tartqan bolatyn.

Aslanbek ishki chempıonatta Júsipovten jeńilse de, halyqaralyq alamandarda talaı myqtynyń mysyn basqan. El de sony alǵa tartatyn. Endi Serbııa tórinde eki saıypqyranymyz da baq synamaq. Abylaıhan Júsipov 67 kılogramm salmaqta «kim myqty?» degen saýalǵa jaýap izdese, Shymbergenov 71 kılogramm salmaqta sharshy alańǵa kóteriledi.

Álem chempıonaty syndy baıraqty básekede alǵash ret qolǵap túıistiretin Aslanbekten daıyndyǵy jaıly suraǵan edik.

«Álem chempıonatyna bári myqty daıyndyqpen barady. Men de jaqsylap jattyqtym. Buıyrsa eldiń namysy úshin barymdy salyp, jankúıerlerdi qýantýǵa tyrysamyn» deıdi Azııa oıyndarynyń kúmis júldegeri.

Tuńǵysh ret AIBA júldegerlerge qomaqty qarjylaı syılyq daıyndap otyr. Osy oraıda Aslanbekke: «Úlken kólemdegi syılyq ta chempıon ataný úshin jigerlendiredi me?" degen saýaldy da qoıdyq.

«Men úshin aqsha emes, eldiń abyroıy qymbat» dep jaýap berdi Halyqaralyq dárejedegi sport sheberi.

Aıta keteıik, Serbııa astanasy Belgrad qalasynda 24 qazan kúni bastalatyn álem chempıonaty 6 qarasha kúni túıindeledi. Bul alamanda ulttyq qurama barynsha jańartylǵan qurammen topqa túspek. Tokıo Olımpıadasynda 69 kılogramm salmaqta top jarǵan kýbalyq Ronıel Iglesıas Sotolongo, Rıo Olımpadasynyń kúmis júldegeri, búginde kásipqoı boksta jarqyrap júrgen ózbek oǵlany Shahram Gııasov ta álem chempıontynda 71 kılogramm salmaqta sharshy alańǵa shyǵady. Aslanbek búkilálemdik boks serııasy aıasynda «Astana arlandarynyń» quramynda júrip bul eki myqtyny da jeńgen bolatyn.

Kezinde mamandar tarapynan «birinshi raýndta bokstaspaı, ekinshi jáne úshinshi úsh mınýttyqta iske kirisedi" degen syn estigen Shymbergenov bul joly úsh raýndta da birinshi nómirde jumys istemek. Jeke bapkerimen tyńǵylyqty daıyndaldy. Soǵan qaraǵanda Aslanbektiń altynnan úmiti bar sııaqty.

Sońǵy jańalyqtar

Qyrǵyzstanda tynyshtyq kúni ornady

Álem • Búgin, 12:30

Koronavırýstyń jańa shtammyna ataý berildi

Koronavırýs • Búgin, 11:37

Vaksına saldyrǵandar sany artty

Koronavırýs • Búgin, 09:35

Pavlodar oblylysy «qyzyl» aımaqtan shyqty

Koronavırýs • Búgin, 09:16

905 adamnan koronavırýs anyqtaldy

Koronavırýs • Búgin, 09:08

Bek pen Aıdos jattyǵýǵa kiristi

Kásipqoı boks • Keshe

Uqsas jańalyqtar