«Búgin halyq jazýshysy, qazaq ádebıetiniń klassıgi, Qazaqstannyń Eńbek Eri Ábdijámil Nurpeıisovtiń týǵan kúni. Sanaly ǵumyryn jazý-syzýǵa arnaǵan aǵamyz 97 jasqa tolyp otyr.
Qalamgerdiń ǵumyr jolyna qarap otyryp, ult tarıhynyń ótken ǵasyrdaǵy tutas taraýlaryn kórýge bolady. Ábekeń bala kúninde tárkileý, asharshylyq sııaqty zobalańdardy basynan ótkerdi. On segizge tolar-tolmas shaǵynda soǵysqa attandy. Osynyń bári keıin jazýshynyń shyǵarmashylyǵyna arqaý boldy.
Shyn máninde, sýretkerdiń qalamynan týǵan dúnıeler – qazaq ádebıetiniń altyn qoryna qosylǵan qymbat qazyna. Onyń ishinde «Qan men ter» jáne «Sońǵy paryz» romandarynyń shoqtyǵy bıik. Bul shyǵarmalar qashanda ár býynnyń súıip oqıtyn týyndylary bolyp qala beredi.
Aǵamyz shyǵarmalarynyń basym bóligin keńestik kezeńde jazǵany belgili. Degenmen, táýelsizdik alǵan tusta da ulttyq ádebıettiń órisin keńeıtýge zor eńbek sińirdi. Qazaq PEN-klýbyn quryp, onyń janynan «Tań-Sholpan» atty ádebı jýrnal ashty. Bul egemendiktiń eleń-alań shaǵynda jańa zamanǵa beıimdele qoımaǵan qalamgerler úshin úlken qoldaý boldy. Osylaısha Ábekeń ádebıetke degen adaldyqtyń ozyq úlgisin kórsetti.
Jalpy, Ábdijámil aǵa týraly aıtqanda, onyń tabandylyq, irilik, órlik qasıetterine toqtalmaı ketý múmkin emes. Rasymen, aǵamyz buralańy kóp ómir jolynda eshqashan óz bıiginen tómendegen emes. Qashanda asqaq, aqsúıek, kerbez qalpyn saqtaı bildi.
Ardaqty Ábe! Týǵan kúnińizben quttyqtaı otyryp, Sizge zor densaýlyq jáne amandyq tileımin! Eldiń yqylasyna bólenip, ortamyzda aman-esen júre berińiz», dep jazdy Máýlen Áshimbaev Facebook paraqshasynda.
