«Ortasha ónimdilik gektaryna 10,2 sentnerdi qurap, 16,1 mln tonna ónim bastyryldy, onyń 11,8 mln tonnasy bıdaı. Sondaı-aq 1,6 mln tonna maıly daqyldar, 3,8 mln tonna kartop, 4,6 mln tonna kókónis daqyldary, 2,6 mln tonna baqsha daqyldary jınaldy», delingen Aýyl sharýashylyǵy mınıstrligi málimetinde.
Negizgi astyq egetin óńirler - Aqmola, Qostanaı jáne Soltústik Qazaqstan oblystarynda 11,6 mln gektar jınaldy, bul olardyń jalpy jınaý alańynyń 100 paıyzyn qurady. Ortasha ónimdilik 8,8 sentnerge jetip, 10,1 mln tonna bastyryldy.
«Egin jınaý jumystaryn ýaqytyly júrgizý úshin aýyl sharýashylyǵy taýarlaryn óndirýshilerge 396,5 myń tonna jeńildetilgen baǵadaǵy dızel otyny bólindi. Energetıka mınıstrligimen birlesip, oblys operatorlaryn MО́Z-ge bekitý kestesi jasaldy. 2021 jylǵy 22 qazandaǵy jaǵdaı boıynsha shilde-qazan aılarynyń kestesindegi 396,5 myń tonnanyń 370,1 myń tonnasy (93%) tıeldi», delingen vedomstvo málimetinde.
Respýblıkadaǵy astyq saqtaýdyń jalpy syıymdylyǵy 29,4 mln tonna, onyń ishinde astyq qabyldaý kásiporyndarynda 12,8 mln tonna, aýyl sharýashylyǵy óndirýshilerinde 16,6 mln tonna. 15 qazandaǵy jaǵdaı boıynsha 3,5 mln tonna astyq saqtaýǵa jóneltildi.
«Jalpy egin jınaý boljanǵan kólemde aıaqtaldy. Jınalǵan daqyl sapasynyń joǵary kórsetkishterin atap ótken jón. Aýyl sharýashylyǵy mınıstrliginiń esepteýi boıynsha qalǵan kólem qazan aıynyń sońyna deıin jınalady», delingen mınıstrlik habarlamasynda.
