Oblys ortalyǵyndaǵy 16 mekteptiń 41 synyby qashyqtan oqytýǵa kóshirilgen. Qazir mamandardyń aıtýyna qaraǵanda, juqpaly derttiń jaıylýy órshı túsken. Sóz arasynda el shetine indet jetkeli oblys ortalyǵynda ǵana 13 167 adamnyń indetke shaldyqqany belgili bolyp otyr. Alǵashynda balalar din aman bolsa, qazir olardyń arasynda da derttiń etek alýy alańdatarlyq.
Kókshetaý qalasynyń bas sanıtarlyq dárigeri Qanat Ysqaqovtyń aıtýyna qaraǵanda, oblys ortalyǵyndaǵy aýrýhanalar 83 paıyzǵa tolyq. 21 naýqas jan saqtaý bóliminde jatyr. Indetke shaldyqqandardyń deregin saraptasańyz, barlyq naýqastyń 99 paıyzy – vaksına almaǵandar. Osy bir kórsetkishten-aq vaksınanyń qanshalyqty qajet ekeni týraly oı túıýge bolady. Jańa oqý jyly bastalǵaly 27 bilim oshaǵynda balalardyń indetke shaldyǵýynyń 217 oqıǵasy tirkelgen. Onyń ishinde 195-i qalypty jumys isteıtin bilim oshaqtarynyń oqýshylary bolsa, 22-si – qashyqtan oqıtyndar. Demek qalypty jumys isteıtin bilim oshaqtarynda saqtandyrý sharalary múltiksiz atqarylyp otyr deýge bolmaıdy. Indettiń taralýyn barynsha shekteý úshin barlyq bilim oshaǵynda talap pen tártipti kúsheıtý qajet.
Qazir indetke shaldyqqan barlyq oqýshy em qabyldaýda. Jaman tumaýdan emdelgen kúnniń ózinde aragidik zardaby bolatynyn eskere otyryp, mektep oqýshylarynyń densaýlyǵyn kózdiń qarashyǵyndaı saqtaý qajettigin umytpaǵan jón.
KО́KShETAÝ
