Sońǵy aptada – qazannyń 20-sy men 27-si aralyǵynda oblys aýmaǵynda 307 adam Covid-pen aýyrǵan. Aýrýshańdyq deńgeıi osynyń aldyndaǵy aptamen salystyrǵanda 4,6%-ǵa tómendegeni baıqaldy. Qazannyń 13-19 aralyǵynda 322 syrqat tirkelgen bolatyn.
Jalpy, qazan aıynyń basynan beri oblysta 1 264 adamǵa COVID-19 dıagnozy qoıylǵan. Naýqastardyń ishinde 704 adam JRVI belgilerine shaǵymdanyp, dárigerge qaralǵanda anyqtalsa, olarmen qarym-qatynasta bolǵan 326 adamdy medısına qyzmetkerleri ózderi anyqtap, tirkeýge alǵan. Profılaktıkalyq maqsatta tekserilgen 222 adam, epıdemııalyq qadaǵalaý maqsatynda synama alynǵan 12 adam da osy dıagnozben dáriger baqylaýyna alyndy.
«Koronavırýs kóbine 41-60 jas aralyǵyndaǵy naýqastar arasynda kezdesedi» deıdi oblystyq sanıtarlyq-epıdemııalyq baqylaý basqarmasynyń baspasóz hatshysy Ádemi Ǵıbratqyzy.
Sońǵy kúnderi Reseı Federasııasy koronavırýs ınfeksııasynyń taralýy boıynsha álemde aldyńǵy orynda tur. Reseıdiń bes gýbernııasymen shektesetin Batys Qazaqstan oblysy memlekettik shekaradan ári-beri ótetin jolaýshylardy qatań baqylaýǵa alǵan bolatyn. 1 qazannan beri oblys aýmaǵyna memlekettik shekaradan COVID-19 anyqtamasynsyz 1 008 jolaýshy ótken. Olardan PTR ádisimen COVID-19-ǵa test alynǵan kezde, 2 adamnyń test nátıjesi qaýipti vırýs bar ekenin kórsetken. Eki el arasynda halyqaralyq júk tasymalymen aınalysatyn 1 825 júrgizýshi de osyndaı tekserýden ótip, 3 adamda vırýs anyqtalǵan.
2021 jylǵy 1 qazannan beri Batys Qazaqstan oblysynda sanıtarlyq-karantındik rejimdi buzǵan 103 azamat Ashyq qosymshasyn paıdalaný nátıjesinde belgili boldy. Atap aıtqanda, 87 adam «qyzyl» mártebesimen, 16 adam «sary» mártebesimen kóshede qydyryp, ózgelerdi qaýip-qaterge qaldyrǵan. Osyndaı zań buzýshylyqtar boıynsha 2021 jyldyń 10 maýsymynan beri óńirde Ákimshilik quqyq buzýshylyq týraly kodekstiń 425-baby, 1-bóligi boıynsha jeke tulǵalarǵa 145 hattama toltyrylyp, 6 315 305 teńgege aıyppul salynǵan.
Vaksınalaý koronavırýstyń jáne tumaýdyń aldyn alýdyń eń tıimdi ádisi ekenin dárigerler kópten aıtyp keledi. Batys Qazaqstan oblysynda jyl saıyn turǵyndardyń 10%-dan astamy tumaýǵa qarsy ekpe alady. Bıylǵy 15 qyrkúıekten beri oblysta tumaýǵa qarsy josparly vaksınalaý júrgizilip jatyr. Jergilikti bıýdjet qarajatyna Reseıde óndirilgen «Grıppol+» vaksınasynyń 68 myń dozasy satyp alynǵan. Qazirdiń ózinde tumaýǵa qarsy 46 148 adam ekpe aldy, onyń ishinde 14 jasqa deıingi 6 364 bala, 39 784 eresek adam bar.
Batys Qazaqstan oblysy
