Buryndary ǵalymdardyń qatysýymen ótetin árbir kezdesýde ǵylymı zertteýlerdi qarjylandyrý merzimin 3 jyldan 5 jylǵa deıin ulǵaıtý máseleleri kóteriletin edi.
«Jalaqyny bazalyq qarjylandyrý tetigine tek basshylar men kómekshi qyzmetkerlerdi ǵana emes, sonymen birge ǵylymı qyzmetkerlerdi de qosý qajettiligi týraly másele jyldar boıy kóteriletin. Gýmanıtarlyq beıindegi ǵalymdarymyz (qazaq ádebıeti, til bilimi, Qazaqstan tarıhy, arheologııa, fılosofııa jáne t.b.) osy baǵyttardy qarjylandyrý máselesine erekshe nazar aýdarý qajet ekendigin 10 jyldan astam ýaqyttan beri aıtyp keledi. Endigi kezekte Prezıdenttiń tikeleı qoldaýynyń arqasynda jáne Qazaqstan halqyna Joldaýynda aıtylǵan tapsyrmalarynyń nátıjesinde atalǵan máselelerdiń barlyǵy Úkimettiń bastamashylyq etýimen ári Parlament depýtattarynyń qoldaýymen qabyldanǵan jańa túzetýlerde óz sheshimin tapty. Qysqa merzim ishinde qajetti túzetýler ázirlenip, Parlamenttiń qaraýyna engizildi», dep jazdy mınıstr.
Jańa normalar Memleket basshysy Zań jobasyna qol qoıǵannan keıin kelesi jyldan bastap zańdy kúshine enedi.
«Bul degenimiz, kem degende 1600 ǵalym bazalyq qarjylandyrý sheńberinde turaqty negizde jalaqy ala bastaıdy. Al, gýmanıtarlyq beıindegi ınstıtýttar tikeleı qarjylandyrý sheńberinde tek granttyq jobalarǵa ǵana táýeldi bolmaı, kerisinshe óz baǵyttary boıynsha zertteýler júrgizý úshin turaqty qarjylandyrylatyn bolady. Sonymen qatar ǵylymı qaýymdastyq kóptegen jyldar boıy Ulttyq ǵylymı keńester jumysynyń obektıvtiligin arttyrýǵa umtylyp keledi. О́ıtkeni bıýdjettik qarjylandyrý týraly sheshimdi ǵylymı keńester qabyldaıdy. Sońǵy eki jylda atalǵan keńesterdiń jumysynda aıtarlyqtaı oń ózgerister oryn aldy. Ulttyq ǵylymı keńes sheshimderiniń barynsha negizdiligi men obektıvtiligin qamtamasyz etý úshin zań júzinde apellıasııalyq komıssııa engizilip jatyr. Komıssııa Ulttyq ǵylymı keńes sheshimderine qatysty ǵalymdardyń apellıasııalary men Ádep kodeksin saqtaý máselelerin qarastyratyn bolady», dep jazylǵan Ashat Aımaǵambetovtiń jazbasynda.
