EO bıýdjetinen bólinetin 5 jyldyq qoldaý paketi Eýropalyq Odaqtyń seriktes elderine búkil álemdegi ormandardy qorǵaýǵa, qalpyna keltirýge jáne turaqty basqarýǵa, sondaı-aq Parıj kelisiminiń erejelerin oryndaýǵa kómektesedi.
«Orman – «Jerdiń jasyl ókpesi». Biz olardy qorǵap, qalpyna keltirýimiz kerek. Men álemdik ormandardy qorǵaýǵa 1 mıllıard eýro bólýge mindettenetinimizdi qýana jarııalaımyn. Bul – EO-nyń «Jasyl kelisimge» sáıkes planetamyzdy qorǵaýǵa baǵyttalǵan jahandyq ózgeristerge jetekshilik etý jónindegi mindettemesiniń belgisi», dep málimdedi Ý.Lıaıen.
«EO-nyń ormandardy turaqty basqarýǵa, qalpyna keltirýge jáne qorǵaýǵa qosqan úlesi turaqty ósýge jáne jumys oryndaryn qurýǵa, klımattyń ózgerý saldaryn jumsartýǵa jáne beıimdelýge, sondaı-aq seriktes elderimizde bıoártúrlilikti saqtaýǵa yqpal etedi. Eýropalyq Odaq úkimettermen, azamattyq qoǵammen, jergilikti halyqpen jáne jeke sýbektilermen seriktestikte turaqty damý maqsattaryna qol jetkizý jáne adamdar men planetany birinshi orynǵa qoıý úshin kópjaqty tásil aıasynda jumys isteıdi», dedi Eýrokomıssııanyń halyqaralyq seriktestik jónindegi komıssary Iýtta Ýrpılaınen.
Eýropalyq Odaq óziniń ekojúıesi bar erekshe aýmaq Kongo ózeniniń basseınine erekshe nazar aýdardy. Málimdelgen 1 mlrd eýronyń 250 mln eýrosy kómek paketi sheńberinde Kongo ózeni basseınindegi ekologııalyq maqsattarǵa baǵyttalady.
Qarjylyq mindetteme – Eýropalyq Komıssııanyń Glazgo qalasyndaǵy sammıtte halyqaralyq qoǵamdastyq qabyldaǵan Ormandar jónindegi jahandyq mindettemege qosqan úlesi.
