Memleket basshysy Qasym-Jomart Toqaev Reformalar jónindegi joǵary keńestiń úshinshi otyrysynda Ulttyq sanaqty uıymdastyrý máselesin aıtyp, halyq sanaǵy turǵyndardyń naqty sanyn, onyń jas jáne genderlik quramyn, ýrbanızasııa deńgeıin, tabys kólemi men basqa da mańyzdy taldaý derekterin anyqtap, tekserilgen ári dáıekti basqarýshylyq sheshimder qabyldaýǵa múmkindik beretinin atap ótken bolatyn.
Prezıdent tapsyrmasyna saı ótken Ulttyq halyq sanaǵy Taraz qalasynda qarqyndy túrde júrgizildi deýge bolady. Naýqan barysynda saýalnama alýshylar tek oblys ortalyǵyndaǵy turǵyn úılerdi aralap qana qoımaı, saýda oryndary, kópshilik jerler, saıabaqtarǵa da baryp, turǵyndarǵa túsindirý jumystaryn júrgizip, sanaqtan ótkisi keletin azamattarǵa da járdemdesti. Sonymen qatar, qoǵamdyq kólikterde, aıaladamalarda, adamdar kóp jınalatyn oryndarǵa, qala ishinde ornalasqan LED ekrandarǵa banner men bılbordtar ilinip, halyq sanaǵy jaıly jan-jaqty aqparat kórsetilgen. Ulttyq sanaqtyń mańyzdylyǵyn túsinip, oǵan barynsha atsalysyp júrgen erikti jastardyń da qarasy qalyń boldy. Osyndaı júıeli jumystardyń nátıjesinde aldyn ala málimetter boıynsha, búginde áýlıeatalyqtar sanaqqa belsendi qatysyp, aldyn ala málimet boıynsha shahar turǵyndarynyń sany qazirdiń ózinde 410 myńnan asýda.
«Halyq sanaǵy bastaldy degendi estigen sátte-aq onlaın túrde naýqanǵa qatystym. Qazir tehnologııanyń damyǵan zamany. Sondyqtan da sanaqtyń saýaldaryna jaýap berý esh qıyndyq týdyrǵan joq. Onyń ústine suraqtar da kóńilge qonymdy ári jeńil. Bul naýqan tek turǵyndardyń sanyn bilý úshin ǵana emes, halyqtyń turmys jaǵdaıyn zerttep, qajetti baǵdarlamalardy ázirleý úshin de asa mańyzdy dep oılaımyn», deıdi qala turǵyny Ryskúl Qasymova. Al, zeınetker Rátaı Esenbaeva sanaqtan offlaın formatta ótken.
«Saýalnama alýshylar eń birinshi kelgende úıde eshkim bolmady. Biz joq bolǵandyqtan esikke baılanys nómirlerin jazyp, qystyryp ketken eken. Sol boıynsha habarlasyp edik, qazaqtyń órimdeı uly men qyzy kelip, halyq sanaǵy boıynsha biraz maǵlumattar berip, saýalnama aldy. Olardyń adamdarmen qarym-qatynasy, til tabysýy súısindirerlik. Otbasymyzdyń barlyq múshesi sanaq suraqtaryna jaýap berdi. Otyz jylǵa endi qadam basqan jas memleketimizdegi árbir adam zor mańyzǵa ıe. Halqymyzdyń sany kóbeıse ǵana irgemiz bekip, alpaýyttardyń kóshine ilese alamyz. Osyny jete túsingender halyq sanaǵyna belsene atsalysýy kerek», deıdi turǵyn.
Jambyl oblysy
