«Pedagogtardy daıarlaıtyn joǵary oqý oryndarynyń sany 86-dan 50-ge deıin qysqardy. Pedagogıkalyq baǵyttar boıynsha lısenzııalarǵa 138 qosymsha qaıtaryldy», dep jazady QR Bilim jáne ǵylym mınıstrliginiń baspasóz qyzmeti.
Mınıstrlikke qarasty Bilim jáne ǵylym salasyndaǵy sapany qamtamasyz etý komıtetiniń tóraıymy Gúlzat Kóbenova atap ótkendeı, bolashaqta balalarmen jumys isteıtin pedagogtardyń biliktilik máselesi úlken mańyzǵa ıe.
«Mektepterdegi oqýshylardy óz isin jaqsy kóretin mamandar oqytýy kerek. Bizde bolashaq muǵalimderdi sapaly daıarlaýdy júzege asyratyn joǵary oqý oryndary bar. Degenmen, keıbir ýnıversıtetterdegi tekserý nátıjeleri kóńil kónshitpeıdi jáne barlyq ýnıversıtetter talaptarǵa sáıkes kelmeıtinin kórsetedi. Mınıstrlik bilim berý qyzmetteriniń sapasy talaptarǵa sáıkes kelýi úshin ýaqyt beredi. Eger JOO sapany jaqsartý boıynsha jumys júrgizbese, biz qatań sharalar qabyldaımyz, atap aıtqanda lısenzııadan aıyramyz. Mysaly, qazir bizde pedagogtardy daıarlaıtyn joǵary oqý oryndary az. Biraq olardy básekege qabiletti ýnıversıtetter daıyndaıdy. Ýaqyt óte kele bul oń nátıje beredi», dep túsindirdi ol.
