«Festıvaldiń qazylar alqasy osy júldeni Dárejan О́mirbaevqa berdi, óıtkeni bizge fılmdegi rejısserdiń tek ózine tán qoltańbasy erekshe unady», dedi qazylar alqasynyń múshesi Krıs Fýdjıvara (Chris Fujiwara). – Bul fılm poezııa týraly ǵana emes, sondaı-aq osy ónerdi baǵalamaıtyn zamanda aqyn bolýdyń qanshalyqty qıyn ekenin kórsetetin týyndy. Búgingi kúni bul problema táýelsiz kınogerlerdiń aldynda tur desem, artyq aıtqanym emes. Bul fılm – adamzattyń rýhanı damýyna teńdessiz úles qosatyn ónerge nemquraıdy qaramaıtyn adamdardyń eńbegi, dedi kınosynshy.
Qazaqstandyq rejısser óz sózinde «Aqyn» fılmin joǵary baǵalaǵan qazylar alqasy men festıval kórermenderine alǵysyn bildirip, kórkem týyndynyń naqty baǵasyn ýaqyt beretinin atap ótti.
«Bul meniń ǵana emes, búkil túsirilim tobynyń, sondaı-aq «Qazaqfılm» kınostýdııasynyń jeńisi. Osyndaı júldeler toqtamaı jumys isteýge jiger beredi, kóp rahmet», dedi Dárejan О́mirbaev.
Esterińizge sala ketsek, QR Mádenıet jáne sport mınıstrligi tapsyrysy boıynsha «Ulttyq kınony qoldaý memlekettik ortalyǵy» qoldaýymen Sh.Aımanov atyndaǵy «Qazaqfılm» AQ túsirgen «Aqyn» fılmi Dıdar esimdi moıyndalmaǵan jazýshynyń ómiri týraly. Fılmniń ssenarııi nemis jazýshysy German Gesseniń «Avtorlyq kesh» jelisi boıynshy jazylǵan. Fılmdegi basty róldi «Jigitter» tobynyń ánshisi Erdos Qanaev somdady. Kınotýyndynyń túsirilimderi Almaty qalasynda ótti. Kartınanyń qoıýshy operatory – Borıs Troshev, qoıýshy sýretshisi – Aleksandr Rorokın. Fılmniń prodıýserleri – Iýlııa Kım jáne Erjan Ahmetov.
1980 jyldan beri ótkizilip kele jatqan Tokyo International Film Festival kınofestıvali Halyqaralyq kınoprodıýserler qaýymdastyǵy federasııasynyń (FIAPF ) tirkeýinen ótken, «A» sanatyndaǵy álemdegi úzdik 15 kınobaıqaýdyń qataryna kiretin bedeldi festıvalderdiń biri.
