Memlekettik qyzmet kórsetý salasynda 2019-2021 jyldar aralyǵynda 222 sybaılas jemqorlyq quqyq buzýshylyq tirkelip, 122 adam qylmystyq jaýapkershilikke tartyldy. Keńes múshesi, jumys tobynyń jetekshisi Ǵalym Baıtoqtyń aıtýynsha, ntrcthe barysynda birqatar sybaılas jemqorlyq táýekelderi anyqtaldy. Onyń ishinde memlekettik satyp alý salasy da bar. «Memlekettik korporasııa 2019 jyly 37,7 mlrd teńgege satyp alý júrgizdi. Bul somanyń 70%-dan astamy tikeleı bir kózden alynǵan. Satyp alý týraly 10 myń shartta 4 myńnan astam táýekel anyqtalǵan. Konkýrstarda 705 jetkizýshi tenderlerdi basqalarǵa qaraǵanda jıi utyp alǵan, 2 myńnan astam kelisimshartta baǵalar joǵary kórsetilgen, jetkizý merzimi qysqa. Sonymen qatar korporasııa bıýdjetti tıimsiz josparlaý boıynsha antıreıtıngte 1-orynǵa shyqty», dedi Ǵ.Baıtoq.
Keńes tóraǵasy, Májilis depýtaty Erlan Saırov Halyqqa qyzmet kórsetý ortalyqtarynyń qyzmetteri qalalarǵa qaraǵanda aýyl turǵyndary úshin qoljetimdi emestigin alǵa tartty. «Aýdan ortalyqtarynan 200-300 shaqyrym jerde ornalasqan shaǵyn aýyldar bar. Aýyl turǵyndaryna ol jaqqa qatynaý qıyn. Bul, ásirese, shekaralas aýdandarda ózekti. Sheshimin tabýǵa tıis taǵy bir másele – barlyq jerde qaptap júrgen «deldaldar». Azamattardyń sengishtigin nemese qarapaıym halyqtyń bir bóligi, ásirese, zeınetkerlerdiń elektrondy gadjettermen jumys isteı almaıtynyn paıdalanatyn «pysyqaılar» bar», dedi E.Saırov.
Buǵan jaýap retinde «Azamattarǵa arnalǵan úkimet» MK» KeAQ basqarma tóraǵasy Ádil Qojıhov búginde nnternetke qol jetkizý qıyndyq týǵyzatyn shalǵaı eldi mekenderge arnaıy baratyn 69 mobıldik HQO jumys isteıtinin atap ótti. Sondaı-aq ol Keńes múshelerin sybaılas jemqorlyq táýekelderin tómendetý úshin qabyldanyp jatqan sharalar týraly habardar etti. «Biz sybaılas jemqorlyqqa qarsy ishki standartty ázirledik, 5 myńǵa jýyq túrli aldyn alý is-sharasyn ótkizdik. Mundaı is-sharalardyń birazy Nur Otan partııasymen jáne quqyq qorǵaý organdarymen birlesip ótkizildi. «Jasyryn satyp alýshy» ádisimen júrgizilgen ishki tekserýlerdiń nátıjesinde derbes derekterdi úshinshi tulǵaǵa berýdiń 23 faktisi anyqtaldy», dedi Á.Qojıhov.
Sondaı-aq jıyn barysynda partııa músheleri 200 myńnan astam turǵyny bar Túrkistan oblysynyń Saıram aýdanynda bir ǵana Halyqqa qyzmet kórsetý ortalyǵy jumys isteıtinine nazar aýdardy. Memlekettik korporasııaǵa ekinshi ortalyq ashý máselesin pysyqtaý usynyldy. Sonymen qatar Keńes músheleri memlekettik qyzmet kórsetý júıesin jetildirý maqsatynda qoldanystaǵy zańnamaǵa ózgerister engizýdi usyndy. «Medısınalyq mekeme qyzmetkerleriniń qyzmet kórsetý merzimin saqtamaýynyń saldarynan halyqty emhanalarǵa tirkeý kezinde merzimin ótkizip alý máselesi jıi kezdesedi. Bul – jalǵyz mekemede kezdesetin jaǵdaı emes. Mundaı mysaldar kóp. Memlekettik qyzmetterdi ýaqtyly kórsetpegeni, elektrondy qujattardy qabyldaýdan bas tartqany úshin, sondaı-aq aqparattyq servısterdiń, onyń ishinde egov.kz portalynyń jumysyndaǵy irkilister úshin ákimshilik jaýapkershilik engizgen jón», dedi Ǵ.Baıtoq.
Jıyn qorytyndysynda Nur Otan partııasy janyndaǵy Sybaılas jemqorlyqqa qarsy is-qımyl jónindegi respýblıkalyq qoǵamdyq keńes «Azamattarǵa arnalǵan úkimet» memlekettik korporasııasynan jáne ýákiletti memlekettik organdardan barlyq aıtylǵan máseleni baqylaýǵa alýdy jáne olardy sheshý boıynsha naqty usynystar engizýdi talap etti.
