Qazaqstan konstıtýsııalyq quqyǵynyń klassıkteri

Dıalogtiń moderatory Nur­sul­tan Nazarbaev Qory at­qarý­­shy dırektorynyń orynba­sary, Prezıdent janyndaǵy Adam quqyqtary jónindegi komıs­sııa­nyń tóraǵasy Igor Rogov boldy. «Búgingi shara dáýirlik oqıǵa – elimizdiń memlekettik Táýel­sizdiginiń 30 jyldyǵyna ar­na­lady. Bul mereıtoı – zamanaýı tabysty memleket qurǵan Qazaq­stan halqynyń orasan zor tarı­hı jetistikteriniń senimdi dál­eli. Barlyq jetistikterimiz Tuń­ǵysh Prezıdent – Elbasy Nur­sul­tan Nazarbaevtyń kóre­gen­diligi jáne Qazaqstan azamat­tarynyń janqııarlyq eńbeginiń jemisi», dedi vebınar júrgizýshisi. Sonymen qatar ol, «jańa memle­ket­tiligimiz bos jatqan jerden paıda bolmaǵanyn este ustaǵan jón. Qazaqstandyq ǵalymdardyń, eń aldymen, zańgerlerdiń kúsh-jigerimen jańa memleket qurýǵa múmkindik bergen ádistemelik baza jasaldy. Bul rette, árıne, altyn ǵylymı qorymyzdyń klas­sık­teri­niń esimderi men ıdeıalaryn bilý mańyzdy» ekendigin atap ótti.

Vebınardyń lektorlary zań ǵylymdarynyń kandıdaty, dosent, Jara­tylystaný ǵylym­dary akade­mııasynyń akade­mıgi, ál-Fara­bı atyn­daǵy QazUÝ-dyń profes­sory Erkesh Nurpeıisov, Parla­ment Senaty Halyq­ara­lyq qaty­nas­tar, qorǵanys jáne qaýipsizdik komı­tetiniń tóraǵa­sy, zań ǵy­lym­darynyń doktory, profes­sor Muhtar Qul-Muhammed, M.S.Ná­rik­baev atyndaǵy QazGZÝ ýnı­ver­­­sıtetiniń quqyqtyq saıa­sat, kons­­tıtýsııalyq zańnama jáne mem­lekettik basqarý boıynsha ǵyly­mı jobalardyń jetek­shisi, profes­sor Sergeı Ýdarsev, Kons­tıtýsııalyq Keńestiń mú­shesi, zań ǵylymdarynyń dok­tory, professor Vıktor Ma­lınov­skıı boldy.

Kons­tıtýsııalyq Keńestiń tór­aǵasy, zań ǵylymdarynyń doktory, professor Qaırat Mámı «Qazaq­stan konstıtýsııalyq qu­qy­ǵynyń klassıkteri» atty dáristi tyńdaýshylarǵa qut­tyq­taý sóz sóıledi. «Biz búgin zań ǵy­lymynyń damýyna úles qos­qan tulǵalardy eske ala otyryp, olardy esimizge alyp, qur­met­tep qana qoımaı, óskeleń ur­paq­qa qundy málimetterdi jet­­kizý­demiz. Osylaısha, ın­tel­­lek­týaldyq sabaqtastyq úzil­meı­di. Bizdiń kezdesýimiz konstı­týsııa­lyq quqyq klassıkterine arnalady. Olardyń eńbegi sol, mine, egemendigimizdi jarııalaǵa­ny­myzǵa 30 jyl ótti. Biz ege­men­digimizdiń berik irgesi qalyp­tas­qanyn anyq aıta alamyz. Olardyń qalyptasqan ınstıtýttar týraly ıdeıalary men ǵylymı eńbekteri memlekettik bılik pen basqarý fýnksııalaryn belgiledi», dedi spıker.

Oǵan qosa, Qaırat Mámı eń aldymen, konstıtýsııalyq quqyq salasyndaǵy biregeı ǵylymı eńbekter men zertteýlerdiń kitaphanasyn qurý bastamasyn kóterdi. Ol jınalǵandardy zań ǵy­lymy salasyndaǵy buryn jarııa­lanǵan ǵylymı eńbekterdiń, monografııalardyń, oqýlyqtar men kitaptardyń kóshirmelerin Konstıtýsııalyq Keńeske joldaýdy usyndy. Bul ádebıettter tek ǵalymdarǵa ǵana emes, bar­lyq tájirıbeli zańgerlerge de tegin jáne qoljetimdi bolady. Onyń oıynsha, mundaı shara ulttyq quqyqtyq mádenıetti qalyp­tas­tyrýǵa yqpal etedi.

Vebınar barysynda lektorlar Salyq Zımanov, Ǵaırat Saparǵalıev, Sultan Sartaev jáne Vladımır Kım sekildi Qazaqstannyń kórnekti zańgerleri men quqyq­taný­shy­lary­nyń ómir­baıandary men kásibı jáne shyǵar­mashylyq jolyndaǵy basty belesterin sóz etti.

Erkesh Nurpeıisov Ǵaırat Saparǵalıevtiń tyń usynys­tardy tujyrymdaýdaǵy uqyp­tylyǵymen jáne aıqyn­dyly­ǵymen erekshelenetinine nazar aýdardy.

Muhtar Qul-Muhammed zań ǵylymdarynyń kórnekti qaı­ratkeri, akademık Salyq Zımanov týraly aıta kelip, onyń zań tarıhnamasyna, qazaqtardyń ádet-ǵuryp quqyǵyn zertteýge jáne konstıtýsııalyq-quqyqtyq zertteý ádistemesine qosqan úlesine ekpin berdi.

Sergeı Ýdarsev «S.Sartaev – ǵalym, oıshyl jáne konstıtý­sııalyq qurylystyń tájirıbeli mamany» dep, akademıktiń Qazaq­standaǵy konstıtýsıonalızm ıdeıalarynyń qalyptasýy men júzege asýyndaǵy rólin atady.

Odan keıin Vıktor Malınov­skıı ǵalym jáne daryndy zertteýshi Vladımır Kım týraly sózinde: «Vladımır Aleksan­dro­vıchtiń barlyq monografııalary egemen Qazaqstannyń kons­tı­týsııalyq qurylysy salasyndaǵy eleýli ǵylymı zertteýler bolyp sanalady», dedi.