Ekologııa, geologııa jáne tabıǵı resýrstar mınıstrligine qarasty Balyq sharýashylyǵy komıteti balyq resýrstaryn turaqty paıdalaný úshin olardy saqtaý men ósimin molaıtýǵa basymdyq berip keledi. «Bul rette mańyzdy mindetterdiń biri – tabıǵı ósimdi molaıtý úshin jaǵdaılar jasaý jónindegi is-sharalardy iske asyrý, sondaı-aq qoldan ósirý arqyly balyq resýrstaryn ulǵaıtý» delingen mınıstrliktiń baspasóz habarlamasynda.
Bul jumystardy Atyraý oblysyndaǵy eki bekire balyq ósirý zaýyty, Qyzylorda jáne Soltústik Qazaqstan oblystarynda ornalasqan Qamystybas jáne Petropavl balyq tálimbaǵy qolǵa alǵan. «Olar ósirgen qundy balyq túrleri jyl saıyn balyq sharýashylyǵy sý aıdyndaryna jiberiledi. Aıtalyq, 2021 jyly qundy balyq túrleri: bekire, aqsaha, tuqy jáne ósimdikjemdi balyǵynyń 68 mln dana shabaǵy qoldan ósirilip, tabıǵı mekenine jiberildi. Sonymen qatar, sý aıdyndaryndaǵy balyqty kóbeıtý úshin kóptegen kásiporyndarǵa memlekettik tapsyrystar beriledi. Bul mekemeler arasyndaǵy básekelestikti týǵyzady jáne balyqty kóbeıtýge múmkindik beredi» deıdi mınıstrlik mamandary.
Bıyl Aral-Syrdarııa, Balqash-Alakól, Esil, Jaıyq-Kaspıı jáne Nura-Sarysý basseınderiniń sý qoımalaryna 6,3 mln dana qundy balyq túrleriniń shabaqtary, onyń ishinde bir mln bekire tuqymdas shabaq jiberilgen eken.
Jalpy, bıyl memlekettik tapsyrys sheńberinde baǵaly balyq túrleriniń 74,3 mln dana shabaqtary ósirilgen.
Buǵan qosa, balyq aýlaý sýbektileri jyl saıyn sý aıdyndaryn shamamen 200 mln dana sırek kezdesetin balyq túrlerimen tolyqqan.
