Qaýymdastyq bıyl toǵyz aıdaǵy otandyq bank sektorynyń ahýalyna sholý jasaǵan. Onda zańdy tulǵalardyń nesıe alýdaǵy úlesi basym ekenine qaramastan bólshek nesıe portfeliniń áldeqaıda joǵary ósim kórsetkeni (+27 paıyz nemese 2,1 trln teńge) aıtylady. Bızneske berilgen nesıe 4 paıyzǵa ǵana ósim kórsetken.
«Zańdy tulǵalar nesıesiniń esepten shyǵarylýy (-475 mlrd teńge maýsym aıynda) jáne qazirgi qaryzdy qaıta qarjylandyrý esebinen osyndaı basymdyq qalyptasqan bolýy múmkin. Jyl basynan beri NPL deńgeıi 6,9-dan 4,3 paıyzǵa deıin tómendedi. Ekinshi deńgeıli bankterdiń resýrstyq bazasy depozıtter esebinen edáýir artty (+16 paıyz nemese 3,5 trln teńge). Bul salymdar boıynsha paıyzdyq syıaqynyń kapıtaldanýy jáne azamattar men kásiporyndar tabysynyń qaıta qalpyna kele bastaýymen baılanysty. Kapıtaldaný esebinen dıvıdendter tólengenine qaramastan tabys pen ekinshi deńgeıli bankterdiń menshik kapıtaly turaqty túrde ósip jatyr (+10 paıyz nemese 395 mlrd teńge). Sektordyń tabysy toǵyz aıda 925 mlrd teńgege deıin kóbeıdi. Byltyr toǵyz aıdaǵy tabys nebári 597 mlrd teńgeni quraǵan edi. Makroekonomıkalyq jaǵdaıdyń anaǵurlym jaqsarýy ekonomıka sýbektileriniń qaryz resýrstaryn paıdalaný jáne jınaq qalyptastyrý qabiletine oń áser etedi» dep jazady qaýymdastyq.
Sóz joq, naryqta bolyp jatqan ońtaıly úrdister bankterdiń deńgeıine de áser etpeı qoımaıdy. Jyl basynan beri 8 ekinshi deńgeıli banktiń reıtıngi kóterilgen. Sektordaǵy bank kórsetkishterin baǵalap otyratyn S&P, Fitch jáne Moody’s reıtıng agenttikteri 8 banktiń deńgeıin jalpy jınaqtaı alǵanda 12 ret joǵarylatypty.
Qaýymdastyqtyń paıymdaýynsha, qaryz resýrstaryna degen suranystyń ósýi, birqatar jeńildetilgen baǵdarlamalardyń qolǵa alynýy, aqsha-nesıe saıasatynyń birqalypqa túse bastaýy 2021 jyly jańa nesıelerdiń molynan berilýine jol ashqan. Nesıe portfelinde, ásirese, tutynýshylyq (jyl basynan beri +28 paıyz) jáne ıpotekalyq segmenttiń (jyl basynan beri +23 paıyz) úlesi joǵary.
«Degenmen suranystyń keıinge qalýy, zeınetaqy jınaǵynan artyq aqsha alý sııaqty bir rettik faktorlardyń joǵalýyna jáne memlekettik baǵdarlamalardyń qysqarýyna baılanysty nesıe belsendiliginiń dınamıkasy qaıta álsireýi múmkin. Korporatıvti sektorda bári suranys sapasyna, qaryz alýshynyń qarjylyq jaǵdaıyna jáne aýqymdy memlekettik baǵdarlamalardyń kólemi men baǵytyna baılanysty», deıdi qaýymdastyq.
