Qoǵamǵa keltirer paıdasy mol, jan-jaǵyna tek jaqsylyq nuryn shashatyn jandardyń ǵumyrynyń qysqa bolatyny da – ómir zańdylyǵy. Aýrý degen aýyr synaqty qaısarlyqpen kótergen Keńeshan Asylhanulynyń ómirden ótkenine de bir jylǵa taıap qalypty. Qymbat jannyń qazasy bárimizge aýyr tıgeni anyq. Jaqsy adamdy júrek qısyn ba, jol bastar tálimger, syıly áriptes, adal dosty izdep, qabyrǵamyzdyń qaıysatyny da ras.
Keńeshan Asylhanuly qysqa ǵumyrynda týǵan-týys, dos-jarandary men áriptesteriniń qamqorshysy bola bildi. Kásippen aınalysa júrip qoǵamdyq isterge de kóńil bóldi. Kásibin jańadan bastaǵandarǵa jol kórsetip, zamanaýı bıznes-jobalardy usynyp, óz kásipterin dóńgelentip ketkeninshe qamqorlyǵyn kórsetti. Ál-aýqaty tómen otbasylarǵa qamqorlyq jasap, árdaıym kómektesip turdy.
Otbasyna da qamqorshy áke, adal jar bola bildi, ómirlik qosaǵy Aıman Zamanbekqyzyn qatty syılady, balalary men nemerelerin janyndaı jaqsy kórdi. Týǵan-týys, quda-qudaǵılarymen de syılastyqta boldy. Kúıeý balalaryn óz balalaryndaı kórdi, olarǵa aqylshy, keńesshi, dos bola bildi.
Basyna qandaı aýyrtpashylyq tússe de syr bermeıtin baısaldy kisi edi. Kóńil kúıi bolmaı, ishteı kúızelip júrse bildirmeıtin. Qazir oılasaq, ol da jaqyndaryna degen shynaıy qamqorlyqtyń úlgisi, «meni oılap alańdamasyn, ýaıymǵa salynyp, qınalmasyn» degeni eken-aý?!
Keńeshan Asylhanulynyń týyp-ósken mekeni – Almaty oblysy, Eskeldi aýdany, Shubar aýylyna degen mahabbaty erekshe edi. Árdaıym aýylyn saǵynyp júretin, qajet bolǵanda qamqor qolyn sozýdan esh tartynbaıtyn. Osyndaı aıadaı aýyldan bala kezden bilimge qushtar, ár nárseniń syryn bilýge, zertteýge yntyq bolyp ósip, úlken ómirge qadam basty, bıik belesterdi baǵyndyrdy emes pe?!
Keńeshan Asylhanulynyń ómirderegine toqtalar bolsaq, ol eńbek jolyn 1983 jyly MMTÝ-54-te oqytýshy bolyp bastady. 1985 jyly AMTÝ-3, 1990 jyly Taldyqorǵan zooveterınarlyq tehnıkýmynda oqytýshy boldy. 1994 jyly «Temir» fırmasynyń dırektory, 1998 jyly «Jarkent» MQKK dırektory, 2005 jyly «Alrýn» asyl tuqymdy zaýyty» JShS Taldyqorǵan aımaqtyq fılıalynyń dırektory qyzmetterin atqardy.
Kandıdattyq dıssertasııasyn «Sharýa jáne fermer qojalyqtarynda qoılardyń ónimdiligin arttyrý úshin etti baǵyttaǵy tuqymdyq qoshqarlardy paıdalaný» taqyrybyna arnady. 2016 jyly Qazaqstan Respýblıkasynyń Qoı sharýashylyǵy Respýblıkalyq Palatalaryn quryp, ómiriniń sońyna deıin osy Palatalardyń dırektory qyzmetin atqardy. «Qazaqstan qoı ósirýshiler odaǵynyń» jáne «Jetisý qoı ósirýshiler assosıasııasynyń» Prezıdenti boldy.
Aýyl sharýashylyǵy mınıstiriniń Alǵys hatymen, 2018 jyly «Aýyl sharýashylyǵy salasynyń úzdigi» tósbelgisimen marapattaldy.
Qazaqstan Respýblıkasy jáne Almaty oblysy qoı sharýashylyǵy salasyn 2030 jylǵa deıin damytý baǵdarlamalarynyń jetekshisi retinde talaı jarqyn istiń bastamashysy bolǵan, túrli menshik nysandarynda qoılardyń genetıkasy men ónimdiligin joǵarylatýda seleksııalyq-asyldandyrý jumystarynyń otandyq zamanaýı ádisterin engizýde belsendilik tanytqan jannyń eńbegi, eli úshin jasaǵan qyzmeti zor.
Keńeshan Asylhanulynyń nurly beınesi, adamı úlken qasıeti, eńbekke degen ynta-yqylasy, jigerliligimen bizge árqashan úlgi bolyp qala bermek.
«Qylshyq júndi (Edilbaı, Qazaqtyń qylshyq júndi quıryqty, Ordabasy, Saryarqa qylshyq júndi quıryqty) ónimdilik baǵytyndaǵy qoılardyń» respýblıkalyq palatasy
