Kezdesý barysynda Táýelsizdiktiń 30 jylynda jetken jetistikteri jáne jergilikti ókildi organdardyń óńirlerdiń damýyndaǵy róli sóz boldy.
«Prezıdentimizdiń elimizdi jańǵyrtý baǵdary Táýelsizdigimizdi nyǵaıtýǵa jáne halyqtyń áleýmettik jaǵdaıyn jaqsartýǵa arnalǵan. Sonyń aıasynda júıeli reformalar iske asyrylýda. Memleket basshysynyń barlyq baǵdarlamalary men bastamalarynyń óńirlerde tabysty oryndalýynda Máslıhattardyń róli erekshe», dedi Máýlen Áshimbaev.
Senat Spıkeri el Prezıdenti bıylǵy Joldaýda óńirlerdiń damýyna qatysty birqatar mindetterdi belgilep bergenin aıtyp, olarǵa keńinen toqtalyp ótti. Onyń ishinde qalalar men aýyldardy júz paıyz taza aýyz sýmen qamtamasyz etý, elimizdiń «ishki baılanysyn» arttyrý, óńirlerdegi ekologııalyq máselelerdi sheshý jáne taǵy basqa basymdyqtar bar. Senat Tóraǵasy bul mindetter jergilikti atqarýshy organdardyń jaýapkershiligin arttyratynyn tilge tıek etti.
«Bul rette bólingen qarajattyń tıimdi jumsalýyn baqylaý jáne Memleket basshysynyń bastamasymen qolǵa alynǵan jobalardyń iske asyrylýyna monıtorıng júrgizý máslıhattardyń mindeti ekeni belgili», dedi Máýlen Áshimbaev.
Is-sharaǵa qatysýshylar monoqalalardyń damýyna qatysty máselelerdi de keńinen qozǵady. Olar bul másele jergilikti bıýdjet pen óńirdiń damý jospary bekitilgen kezde basty nazarda bolý kerektigin aıtty.
Sonymen qatar Prezıdentimizdiń elimizdi jańǵyrtý reformalarynyń basymdyqtary da áńgimege arqaý boldy. Sonyń aıasynda qatysýshylar jergilikti ókildi jáne atqarýshy bıliktiń derbestigin arttyrý, ókilettikterdi ortalyqtan jergilikti deńgeıge berý jáne jergilikti memlekettik basqarý men ózin ózi basqarýdy nyǵaıtý máselelerine aıryqshy toqtaldy.
«Bıyl elimizde alǵash ret aýyl ákimderiniń saılaýy ótti. Sonyń nátıjesinde 800-den astam aýyldyń ákimi saılandy. Nátıjesinde olardyń jartysy derligi jańardy. Aýyl ákimderin saılaý ınstıtýtyn engizý azamattardy jergilikti bılikti qalyptastyrýǵa jumyldyrýdyń mańyzdy tetigi», dedi Máýlen Áshimbaev.
Sondaı-aq Senat Spıkeri Palata jumysynyń eń basty basymdyǵy el Prezıdentiniń jańǵyrý baǵdaryn zańnamalyq turǵydan qamtamasyz etý ekenin aıtty.
Sonymen birge senatorlar aýyl turǵyndarynyń ómir súrý sapasyn jaqsartýǵa da basa mán berip otyr. Máýlen Áshimbaev óńirlerdiń damýy Senat depýtattarynyń únemi basty nazarynda ekenin atap ótti.
«О́ńir» depýtattyq tobynyń quramy jańaryp, jańa jumys jospary qabyldandy. Soǵan sáıkes Top depýtattary óńirlerge baryp, ózderińizben jáne turǵyndarmen kezdesip, jergilikti halyqty alańdatqan máselelerge basymdyq beretin bolady. Nátıjesinde óńirdegi máseleni respýblıkalyq deńgeıde sheshýdiń joldaryn usynady. Top jumysyndaǵy basymdyqtardyń qatarynda aýyldardy aýyz sýmen qamtamasyz etý, ishki kóshi-qon jáne taǵy basqa máseleler bar. Sondaı-aq bul baǵytta Senat janyndaǵy Máslıhattarmen ózara is-qımyl jónindegi keńestiń de mańyzy joǵary. Keńes músheleri men barlyq deńgeıdegi máslıhat depýtattary jıi kezdesip, zań jobalaryn birlesip talqylaýǵa múmkindik mol», degen Máýlen Áshimbaev Máslıhat hatshylaryn atalǵan alańdardy óńirlerdegi máselelerdi sheshýde, zańnamalyq jumysta, Memleket basshysynyń saıasaty men qabyldanǵan zańdardyń mańyzyn túsindirýde tıimdi paıdalanýǵa jáne Senatpen birlesip jumys isteýde belsendilik tanytýǵa shaqyrdy.
