Arnaıy maqsattaǵy kúshter týraly kóptegen fılm túsirilip, kitaptar men maqalalar jazylyp jatsa da, qalyń oqyrmanǵa olardyń ómiri qupııa bolyp kórinedi. Sol sebepten bolar, jas jigitten bastap, áskerı ómirdiń qyr-syryn meńgergen ofıserlerge deıin, dál osy elıtalyq bólimshelerdiń qatarynda qyzmet etýdi armandaıdy.
KSRO kezinde aty ańyzǵa aınalǵan «A» («Alfa») bóliminiń dástúrlerin jalǵastyrǵan terrorızmge qarsy arnaıy áskerı bólimshe («A» bólimi) qysqa merzimde jaýyngerlik daıyndyqtyń joǵarǵy deńgeıine qol jetkizdi. Táýelsiz elimizdiń alǵashqy kúninen bastap uıymdasqan qylmys pen terrorlyq áreketterge qarsy kúreste erekshe kózge túsken «Arystan» qyzmeti teńdessiz erliktiń, ustamdylyq pen batyldyqtyń sımvolyna aınaldy.
2015 jylǵy jeltoqsanda Tuńǵysh Prezıdent Nursultan Nazarbaev «Arystan» qyzmetiniń jeke quramymen kezdesip, atalǵan vedomstvonyń materıaldyq-tehnıkalyq bazasymen tanysty.
«Sizderdiń qyzmetterińiz aýyr ekenin bilemin, bul kúndelikti jattyǵýlar men aǵzaǵa túsetin úlken fızıkalyq salmaqtar. Biraq jalyndaǵan shaǵyńda bul jarasymdy ári jaǵymdy bolady ǵoı. Jas kezimizde biz de sizder sııaqty arnaıy maqsattaǵy jaýynger bolǵandy qalaıtynbyz. Búgingi kúnniń naǵyz batyrysyńdar. Eshqandaı qaqtyǵystardyń bolmaýyn tileımin, biraq oq-dárimiz qurǵaq bolýy tıis», dedi Nursultan Ábishuly.
2016 jyldyń qyrkúıeginde Qazaqstan Respýblıkasynyń Tuńǵysh Prezıdenti Nursultan Nazarbaev «Arystan» qyzmetiniń negizinde «A» Arnaıy maqsattaǵy qyzmetin qurý týraly Jarlyǵyna qol qoıdy. Memleketimizdiń joǵary basshylyǵy ulttyq qaýipsizdikti qamtamasyz etýdegi «A» Arnaıy maqsattaǵy qyzmetiniń orny men róline erekshe nazar aýdarady. Máselen, 2020 jylǵy UQK alqa otyrysynda Qazaqstan Prezıdenti Qasym-Jomart Toqaev óz sózinde: «Komıtettiń Arnaıy qyzmeti qazirgi zamanǵy syn-qaterler men qaýipterge qarsy turýdaǵy tıimdi quralǵa aınalǵanyna» toqtaldy.
Sońǵy onjyldyqtyń ózinde ǵana Arnaıy qyzmet terrorıstik sıpattaǵy 100-ge jýyq zorlyq-zombylyq árekettiń jolyn kesti. Halyqaralyq terrorıstik uıymdar, onyń ishinde «Ortalyq Azııa modjahedteriniń jamaǵaty», «Djýnd – ál-Halıfat», «Hızb-ýt-Tahrırdiń» Qazaqstandaǵy qurylymdarynyń kózderi joıylyp, basqa da kúrdeli operasııalar júrgizildi. О́zge elderdiń seriktes arnaıy qyzmetterimen birlese otyryp ondaǵan terrorıst pen ekstremıst izdestirilip, ustaldy jáne ekstradısııalandy.
Arnaıy maqsattaǵy jasaqtyń jaýyngerleri úshin alǵashqy mańyzdy synaqtyń biri Shymkent qalasynyń áýejaıynda oryn alǵan reıstik avtobýstaǵy kepilge alynǵan adamdardy bosatý boıynsha arnaıy operasııasy boldy. Ol arnaıy kúshtik qurylymdar tarıhynda «Nabat» operasııasy retinde tanymal. Álemdik tájirıbede alǵash ret terrorıster men kepilge alynǵandar arasynan shyǵyn bolmaǵan «Nabat» operasııasy akademııalyq oqýlyqtarǵa klassıkalyq úlgi retinde endi.
Arnaıy maqsattaǵy kúshterdiń kúndelikti jumysy jaýyngerlik operasııalarǵa daıyndyqpen ótedi. Bir kúni olar terrorıster basyp alǵan ushaqqa «shabýyl jasasa», erteńine poıyz vagonynda nemese teńiz kemesinde óz daǵdylaryn shyńdaıdy. Arnaıy jaýyngerlik tapsyrmaǵa barmas buryn sarbazdar júzdegen, myńdaǵan jattyǵýdan ótedi. Ár qadam, ár qozǵalys, qarýdan atylǵan árbir oq - bári pysyqtalady.
«A» Qyzmetiniń ákimshilik ǵımaratynyń birinshi qabatynda terrorızmge qarsy operasııalar men jedel-jaýyngerlik is-sharalar barysynda qaza tapqan jaýyngerlerdi eske alýǵa arnalǵan eskertkish-belgi ornatylǵan. Qara mármár taqta betine uzaq ári baqytty ómir súrýdi, balalary men nemerelerin súıýdi armandaǵan batyrlardyń esimderi jazylǵan. Olardyń erlikteri eshqashan umytylmaq emes.
«A» Arnaıy maqsattaǵy qyzmettiń sarbazdary máńgilikke attanǵan dostary týraly ótken ýaqytta sóılemeıdi. «Biz úshin olar Otanǵa sheksiz qyzmet etýdiń úlgisi. Biz barda olar da tiri, bizdiń aramyzda árdaıym kórinbeı qoldap, qorǵap júredi, árqaısysyn umytpaı, jadymyzda saqtaımyz» deıdi sarbazdar.
Jaýyngerler qaza tapqan qarýlastarynyń jubaılary men balalaryna kómek pen qoldaý kórsetýdi ózderiniń azamattyq boryshy sanaıdy. Balalardyń ákelik qamqorlyq pen jylýyna zárý ekenderin eskere otyryp, árbir jetistikterine qoldaý bildiredi, sportqa qyzyǵýshylyq tanytqan balalarǵa qajetti keńes pen kómegin beredi. Qaza tapqan jaýyngerlerdiń uldary da batyr ákeleriniń izimen júrip, óz ómirlerin áskerı qyzmetpen baılanystyrǵysy keletini qýantady. Mundaı jaǵdaıda Qyzmet basshylyǵy jas býynnyń áskerı joǵary oqý orynyna túsýine jaǵdaı jasaýǵa tyrysady.
«Otanshyl» sózin UQK «A» Qyzmetiniń jaýyngerlerine esh kúmánsiz qoldanýǵa bolady. О́z halqyna, eline, Prezıdentine adal, súıikti isine shyn berilgen búginginiń batyrlary eń kúrdeli jedel-jaýyngerlik mindetterdi oryndaı otyryp, Qazaqstannyń beıbit ómirin senimdi qorǵaıdy.
Rústem QURMANǴAZIN,
aǵa leıtenant
