Mazmundy jıyndy júrgizgen Eýrazııa ulttyq ýnıversıtetiniń rektory, akademık Erlan Sydyqov mereıtoı ıesiniń qarapaıym jýrnalısten, el bıligi men elshildik qyzmetterdiń jaýapty satylaryna deıin, sonyń ishinde Mádenıet mınıstriniń orynbasary, «Egemen Qazaqstan» RG» AQ prezıdenti, Aqparat mınıstri, Parlament Májilisiniń depýtaty sekildi qyzmetterdi baǵyndyrǵan aıtýly azamattyń mereıtoıyna arnalǵan konferensııanyń mańyzy bólek ekenine toqtalyp, alǵashqy sózdi Memlekettik hatshy Qyrymbek Kósherbaevqa berdi.
Qyrymbek Eleýuly óz sózinde tanymal tulǵanyń táýelsiz Qazaqstandy qurýǵa jáne rýhanııat salasyn baıytýǵa ólsheýsiz úles qosqandardyń biri ekendigin basa aıtty.
– Saýytbek Abdrahmanov – jemisi mol jetpis jasqa memleket jáne qoǵam qaıratkeri, salıqaly saıasatker, qarymdy qalamger atanyp, abyroımen jetip otyr. Shyǵarmashylyǵy laıyqty baǵalanyp, Memlekettik syılyqtyń laýreaty boldy, el-jurttyń aldynda bedeldi halyq qalaýlysyna aınaldy. Aýdarmanyń qyr-syryn, Pýshkın týyndylarynyń tabıǵatyn zerttep, ádebıettanýshy-ǵalym atandy. Sóziniń salmaǵy, isiniń ónegesi bar Sáýkeńdi qurmettep, búgingideı halyqaralyq konferensııa ótkizý – óte oryndy.
Ol – el isine erte aralasyp, atqa qonǵan azamat. Jer júzin sharlap, kópti kórdi. Álemniń 61 memleketin aralap, qyzyqty reportajdar men ocherkter jazdy, − deı kelip, mereıtoı ıesiniń myqty aýdarmashy retinde birqatar álemdik týyndyny ana tilimizde sóıletip, «Egemen Qazaqstan» gazetin basqarǵanda Táýelsizdik shejiresin jazyp, «Sherhannyń shekpeni», «Berdiqulovtyń beshpenti» sekildi «Saýytbektiń saýytynan» shyqqan jýrnalısterdiń ózi bir qaýym ekendigin atap ótti.
Odan keıin memleket jáne qoǵam qaıratkeri, kórnekti ǵalym Myrzataı Joldasbekov elimiz egemendik alǵan jyldarda birge qyzmet istegen izetti inisiniń qaıratkerlik qyry men azamattyq kelbeti jaıynda parasatty oı qozǵap, onyń maqtaýǵa da, maqtanýǵa da turatyn úlken azamat ekendigin jetkizdi.
Jýrnalıstıka jampozynyń sońynan qalam ustap ergen inilerine degen iltıpaty men qurmeti de erekshe. Ony Qazaqstan Prezıdentiniń keńesshisi, akademık Baýyrjan Omaruly mereıtoı ıesin ádemi ázil, órnekti sózben órgen baıandamasynda jan-jaqty jetkizdi.
«Saýytbek Abdrahmanov – anyqtaýyshy alty aýyz sózdi quraıtyn eleýli esim, qarymdy qalamger, qajyrly qaıratker, salıqaly saıasatker, mańǵaz memlekettik qyzmetshi, dańqty depýtat, shıraq sheneýnik, mártebeli mınıstr, aıbarly aqparatshy, azýly apparatshy, alymdy aýdarmashy, áleýetti ádebıettanýshy, parasatty pýshkıntanýshy. Osy áserli epıtetterdiń bári onyń ómir jolynyń ár tusyn órnekteıdi, endi, mine, oǵan jetpistegi jigit degen tamasha tirkes qosyldy», dep jınalǵandardy bir jelpindirip aldy.
Abzal azamattyń sanaly ǵumyrynyń basym bóligi elimizdiń bas basylymynda ótip, el gazetiniń keń qanat jaıýyna úlken úles qosty. «Egemen Qazaqstan» RG» AQ Basqarma tóraǵasy, akademık Darhan Qydyráli Qazyǵurttan shyǵyp, qazaq dalasyn kóziniń qarashyǵyna syıdyryp, qalamynyń ushyna qondyrǵan qalamger týraly salmaqty sóz órbitti.
– Saýytbek aǵa ózi eńbek jolyn bastaǵan «SQ»-nyń murageri – «Egemen Qazaqstan» gazetiniń basshylyǵyna kelgen soń, ekinshi tynysy ashylyp, keńinen kósildi. Shyǵarmashyl ıntellektýaldyq áleýeti, qaıratkerlik qarymy bas basylymda jarqyraı kórinip, tutastaı salanyń jaýapkershiligin arqalaǵan mınıstrlik mansapqa, búgingi halyq qalaýlylarynyń qataryna, eldiktiń sózi aıtylatyn bıik minbe – depýtattyq dárejege jetti. Osy jyldar bederinde jýrnalıstik qabiletin qarymdy qalamgerlik sapadan, qajyrly ǵalymdyq deńgeıge, ulaǵatty ustazdyqqa ushtastyrǵan tulǵanyń mádenıettanýshy, zertteýshi, aýdarmashy, pýblısıst retinde boıyna jınaǵan mol bilimin qalam qýaty arqyly ult rýhanııatyna súbeli qazyna retinde qosty, – dedi ol.
Sondaı-aq jıynda Qazaqstan Respýblıkasy Ardagerler keńesiniń tóraǵasy, memleket jáne qoǵam qaıratkeri Baqtyqoja Izmuhambetov, Mádenıet jáne sport vıse-mınıstri Nurǵısa Dáýeshev, Nur-Sultan qalasy ákiminiń orynbasary Ashat Oralov jáne kórshi Reseı elinen «Hýdojestvennaıa lıteratýra» baspasynyń dırektory, qoǵam qaıratkeri Georgıı Prıahın onlaın baılanysqa shyǵyp, mereıtoı ıesine jyly lebizin bildirdi. Sonymen qatar konferensııa barysynda L.N.Gýmılev atyndaǵy Eýrazııa ulttyq ýnıversıteti ǵylymı keńesiniń sheshimimen Saýytbek Abdrahmanovqa atalǵan oqý ornynyń «Qurmetti professory» ataǵy berilip, qalamgerdiń «Eldik erligi» atty 5 tomdyq pýblısıstıkalyq shyǵarmalary tanystyryldy. Odan keıin halyqaralyq konferensııa seksııalyq májiliske jalǵasty.
