22,5 mlrd teńge: О́ńirlerdegi bıznesti mıkroqarjylandyrýǵa Agrarlyq nesıe korporasııasy qarjy bóldi

Atalǵan bıýdjettik qaryzdy «Bastaý Bıznes» jobasynyń jáne de basqa mem­lekettik baǵdarlamalar sheńberindegi kásipkerlik negizderin oqytý kýrstarynyń túlekteri ala alady.

– Kásipkerlerdiń bıznes-bastamalaryn qoldaý úshin «Jumyspen qamtýdyń jol kartasy» baǵdarlamasy aıasynda 22,5 mlrd teńge bólindi. Bul qarajat jańadan is bastaǵan kásipkerlerge, shaǵyn bıznes, mıkrokásipkerlik ókilderine, onyń ishinde otbasylyq jáne áleýmet­tik kásipkerlikti damytýǵa baǵyttalǵan. Kásip­kerler osy maqsatta tómendetilgen paıyz­dyq mólsherlememen jeńildetilgen kre­dıtter ala alady. Mal sharýashylyǵy salasyndaǵy jobalardyń kredıtteý merzimi 7 jyl bolsa, basqa salalarda 5 jyldy quraıdy, – dep atap ótti Agrarlyq nesıe korporasııasy basqarma tóraǵasynyń orynbasary Aıjan Kenjebaeva.

Jeńildetilgen nesıe alýǵa qoıylatyn talap qıyn emes. Qarjylaı kómek alýǵa nıettilerde «Bastaý Bıznes» jobasy­nyń nemese basqa da memlekettik baǵdar­lamalardyń sertıfıkaty, sondaı-aq kepil múlki bolýy qajet. Iаǵnı arnaıy kýrstar­da bilimi jetildirilgenin aıǵaqtaıtyn qujat­tyń bolýy shart. Bıznes-jospardy sátti qorǵaǵan qatysýshy MQU-dan ne­sıeni rásimdeı alady.

Aýyldyq eldi mekender (olardyń ákim­shilik baǵynystylyǵyna qaramastan) jáne shaǵyn qalalardaǵy kásipkerler – 2,5 myń AEK-ke deıin (7,2 mln teńge); qalalar, monoqalalarda is bastaǵandar (Shymkent, Aqtaý, Atyraýdan basqa) – 6,5 myń AEK-ke deıin (18,9 mln teńge); Shymkentte, Aqtaýda, Atyraýda kásip ıeleri 8 myń AEK-ke deıin (23,3 mln teńge) ala alady.

Qazir kásipkerlerdiń MQU-dan bıýdjettik nesıe alýǵa múmkindikteri bar. Búginge deıin bólingen 22,5 mlrd teńgeden «Agrarlyq nesıe korporasııasy» AQ mıkroqarjy uıymdarynan jalpy somasy 4,7 mlrd teńgege ótinim qabyldady. Onyń ishinde qazirgi ýaqytta 2,6 mlrd teńgege mıkrokredıt berildi.

Osy baǵdarlamany iske asyrý nátı­jesinde Agrarlyq nesıe korporasııasy qoljetimdi qarjylandyrýmen kásipkerlik sýbektileriniń keń aýqymyn qamtýǵa septigin tıgizedi. О́z kezeginde bul aýyldyq jerlerdegi azamattardyń ál-aýqatynyń artýynan kórinedi. Keıingi jyldary jańa óndirister ashylyp, jumys oryndary paıda bolýda, qyzmet kórsetý salasy damyp jatyr.

Jyl basynda mınıstrlik tıisti zań jobalaryn qabyldaý arqyly Doing Business reıtınginde 20 úzdik eldiń qataryna kirý kózdelip otyrǵanyn habarlady. Ol úshin birqatar is-shara ázirlenip jatqany da málim boldy. Prezıdent te jaqynda Qazaqstanda akkredıttelgen shetelderdiń dıplomatııalyq mıssııalarynyń basshylarymen kezdesý barysynda eldegi ekonomıkanyń ósý qarqynyna toqta­lyp, dál osy jospar týraly sóz qozǵady. «Memlekettik apparattyń saıası turaq­tylyǵy men tıimdiligin ekonomıkalyq ósimnen bólip qaraýǵa bolmaıdy. Bul ba­ǵytta birqatar jetistik bar. 2019 jyl­dyń 10 aıynda elimizdiń ishki jalpy ónimi 4,4 paıyzǵa ósti. Doing Business-2020 reıtınginde Qazaqstan 25-orynda. Básekege qabilettiliktiń jahandyq ındeksinde elimiz 55-orynda tur. Aldaǵy bes jyl ishin­de halyqaralyq reıtıngtegi pozısııa­myz­dy aıtarlyqtaı jaqsartýdy josparlap otyrmyz», dedi Qazaqstan Prezıdenti.

Bul baǵdarlama Prezıdent Qasym-Jomart Toqaevtyń mıkroqarjylandyrý­dy damytý boıynsha tapsyrmalaryn iske asyrýǵa yqpal ete otyryp, jańadan kásip bastaǵan kásipkerlerdiń qarjyǵa qol­je­timdiligin aıtarlyqtaı jeńildetýge múmkindik beredi.