Almatylyq 1 myńǵa jýyq jas maman jańa páterlerge qonystandy

Sonymen «Almaty jastary» qalalyq baǵdarlamasy aıasynda bıyl 1 myńǵa jýyq muǵalim, dáriger, jýrnalıst, mádenıet qyzmetkerleri, sportshylar, áleýmettik sala qyz­metkerleri men quqyq qorǵaý organ­da­rynyń jas mamandary baspanaly bolady.

Alaıda jumysy bar, biraq jınaǵan qory, artyq aqshasy joq jastardy qaıtkende páterlermen qamtamasyz etýge bolady? Bir jaǵynan jastardyń ózi de bankter arqyly úıli bolýǵa táýekel ete bermeıdi, ıakı tıimdi joldaryn bilmeıdi. Munyń sheshimin Otba­sy bank Nur-Sultan jáne Almaty qalalarynyń ákimdikterimen birige otyryp tapty.

Jastarǵa tıimdi sharttarmen turǵyn úı satyp alýǵa kómektesý maqsatynda «Almaty jas­tary», Elorda Zhastary atty baǵ­dar­lamalar shyǵardy. Osy taǵdyrsheshti qa­dam qazirdiń ózinde biraz adamdy alǵashqy óz shańyraqtaryna kirgizdi.

Mysaly, «Almaty jastary» baǵdar­lamasymen alǵashqylar qatarynda úıli bol­ǵan­­dardyń biri – «31 arnanyń» marketıng bó­liminiń mamany Aıkerim Belgibaeva.

– Almatyǵa kóship kelgeli men de úı jaldaýdyń qıynshylyqtaryna tap boldym. Úıdiń baǵasy men sapasy sáıkes kelmeıtin, alaıaqtar kóp jáne úı ıesiniń qas-qabaǵyna qarap qınalasyń. Tórt jyl boıy páterden páterge kóship júrdik. Árıne, jaqsy úı ıeleri de boldy, biraq qymbatshylyqtan bólek, páter qojaıyndary da óz talaptaryn qoıady. Qaraǵandy qalasynyń týmasymyn, jasym 30-da, otbasymyzda menen basqa áke-sheshem men sińlim bar. Mamandyǵym boıynsha jumys istemegenimmen, 2017 jyly Almatyǵa kóship kelgeli televızııa salasynda – «31 arnada» marketıng bóliminde qyzmet atqaryp júrmin. О́z úıimdi bıyl jazda, tamyz aıynda aldym. Osy baǵdarlama jaıyn­da estigen boıda naýryz aıynda ótinim ber­dik. «Almaty jastary» týraly byltyr árip­tes­terim úı alǵanda estigen bolatynmyn. Buǵan deıin de jas mamandarǵa arnalǵan baǵ­dar­lamaǵa qatystym, biraq sharttary qıyn bolǵan soń ári qaraı jalǵastyrmadym. Al «Almaty jas­tary» baǵdarlamasynyń sharttary qazirgi jastar úshin memleket usynǵan úlken kómek. Kerekti somany, ıaǵnı alǵashqy jarnany birneshe jyl jınaýdyń qajeti joq. Qyrýar anyqtama, qujat jınap, turaqty tirkeýdi qajettilik etpeıdi. О́z salasynda myqty jas mamandarǵa óz elinde adal eńbek etip, baspanaly bolýyna keremet qulshynys beretin bastama. Taǵy bir ereksheligi, nesıege beriletin somany úı baǵasynyń kóterilýine baılanysty byltyrǵyǵa qaraǵanda ósirgen. Menińshe, 23-25 jasymyzda baspanaly bolý oryndalmas arman jáne kóp qarajat qajet etedi dep oılaıtynmyn. Biraq qazir memleket tarapynan osyndaı baǵdarlamalar úlken demeý. Sondyqtan zamandastaryma aıtarym, osyndaı baǵdarlamalardy oqyp, bilip, túsinbegenin menedjerlerden surap, maqsat qoıyp, talpynyp kórý kerek. Taǵy da qosarym, basqa salada jumys isteıtin jas mamandardy da osy baǵdarlamaǵa qossa, keremet bolar edi. Baspana kiltin alǵannan keıin, 1-2 aptadaı sene almaı júrdim. Bul – úlken qýanysh! «Almaty jastarynyń» taǵy bir ereksheligi – páterdi óziń tańdaı alasyń. Baǵdarlama kóńilimnen shyqty, – deıdi jańadan almatylyq bolyp shyǵa kelgen Aıkerim Muratqyzy.

Endi almatylyq jastarǵa qalaı úı alýǵa bolatyndyǵyn túsindireıik.

Joǵaryda atap ótkendeı, 2021 jyldyń 10 naýryzynda Almaty ákimdigi men «Otbasy bank» AQ jyl saıynǵy birlesken jobasy – «Almaty jastary» baǵdarlamasy bastaldy. Turǵyn úı baǵdarlamasy jas mamandarǵa baspana alý úshin jeńildetilgen nesıe alýǵa múmkindik beredi.

Jobaǵa 35 jasqa deıingi nemese 35 jasqa tolǵan (jubaıynyń/zaıybynyń jasyna qaramastan) erli-zaıyptylardyń bireýi ǵana qatysa alady. О́tinish berýshiniń jáne onyń otbasy músheleriniń atynda sońǵy 5 jylda jyljymaıtyn múlik bolmaýy tıis, tek jekeshelendirý nemese muragerlik quqyqpen kámeletke tolǵanǵa deıin alynǵan jyljymaıtyn múliktegi úles qana eskerilmeıdi. «Almaty jastary» qatysýshylarynyń resmı jumys ótili sońǵy alty aıdan kem bolmaýy tıis ári mindetti zeınetaqy jarnalary aýdarylyp turýy qajet. О́zin-ózi jumyspen qamtyǵan úmitkerlerdiń keminde jarty jyl boıy Almaty qalasynda tirkelgen jáne qyzmet kórsetetin jeke kásipkerligi bolýy mindetti.