Fınlıandııanyń Rýka taý shańǵysy kýrortynda uıymdastyrylǵan frıstaıl-akrobatıkadan bıylǵy álem kýbogy qazaqstandyq sportshylar úshin tabysty bastaldy. Sporttyń dál osy túrinen eki dúrkin qysqy Ýnıversıadanyń qola júldegeri, byltyr Almatyda ótken álem kýbogynyń sońǵy kezeńderinde de el qorjynyna qola medal salǵan Janbota Aldabergenova bul joly da úzdikter qatarynan kórindi. Alǵashqy kezeńinde álemniń myqty sportshylarymen teń dárejede óner kórsetken otandasymyz fınalda 80,04 upaı jınap, jarysty mereıli ekinshi orynmen aıaqtady. Birinshi kezeńniń bas júldesin qytaılyq Kýn Fanıýı jeńip alsa, qola júlde taǵy bir qytaılyq sportshy Shao Kıýge buıyrdy.
Bir aıta keterligi, Fınlıandııanyń kýrortty aımaǵyndaǵy jarystar Janbota Aldabergenova úshin únemi tabysty aıaqtalady. Máselen, ol 2019 jyly dál osy Rýkada ótken Eýropa ashyq kýbogynda bir altyn, bir kúmis medal jeńip alǵan edi.
