Elbasy otanymyzdyń zamandyq damýy men qazirgi álemdik saıası ahýaldy biriktire saraptaıdy. Osy kezeńde jáne bolashaqta ult yntymaǵynyń meılinshe myqty bolýyn aıta kele táýelsizdiktiń basqa qonǵan baqyt ekendigi, ony baǵalaý, qaster tutý – barshamyzdyń qasıetti paryzymyz bolatynyn jazady.
Atalmysh maqalada óskeleń urpaqtyń ǵylymı talpynysyn únemi demep otyrý, álemdik tehnologııalyq úderisten qalmaý týraly da jazylǵan. Pandemııa jaǵdaıyndaǵy qaterdi azaıtý úshin ult medısınasyn damytý da eskerilgen.
Osy rette óner-aǵartýshylyq salasynda júrgen soń rýhanııat salasyna toqtalǵym keledi. Táýelsizdik alǵan dáýirimizde ulttyq ónerdi damytý salasynda Elbasynyń «Bolashaqqa baǵdar: rýhanı jańǵyrý», «Uly dalanyń jeti qyry» atty ulttyq-mádenı baǵdarlamalary jarııalandy. Osy baǵdarlamalar aıasynda án, kúı, jyr, dastan antologııalary, ǵylymı zertteýler, monografııalar men ensıklopedııalar jaryq kórdi. Tarıhı tulǵalar jóninde memlekettik tapsyryspen qyrýar kitap shyqty. Qazaqtyń dástúrli ónerin nasıhattaıtyn halyqaralyq festıvalder uıymdastyryldy. Osynyń bári Elbasynyń rýhanııatymyzdaǵy jitin máselelerdi dóp basa alatyn kóregendigi dep baǵalaımyz.
Táýelsizdigimizdiń alǵashqy jyldary ekonomıkalyq qıyndyqtarǵa qaramastan mádenıet úıleri, konsert zaldary, opera jáne balet teatrlary, óner ýnıversıtetteri men akademııalary quryldy. Qazaq ulysynyń tarıhy týraly kınoepopeıalar túsirildi. Qazirgi egemen elimizdiń dańqyn álemge shyǵaryp júrgen jas daryndarymyz osynaý oqý oryndarynyń túlekteri. Aıta bersek, tańǵa sozýǵa bolady. Táýelsizdik pen Elbasy egiz uǵym ekeni anyq.
Janǵalı JÚZBAI,
kúıshi, Qazaqstannyń eńbek
sińirgen qaıratkeri
