Iá, Tuńǵysh Prezıdent aıtqandaı, Táýelsizdik – ata-babalarymyzdyń azattyq jolyndaǵy jan alysyp, jan berisken san ǵasyrlyq kúresiniń jalǵasy. Jalpy, «Biz táýelsizdikke qalaı qol jetkizdik?» degen saýalǵa aıtylar jaýap san qyrly. El ishinde «Biz táýeldi bolatyn el qalmaǵandyqtan táýelsizdigimizdi jarııaladyq» degen pikirdi jaqtaıtyndar joq emes. Shyntýaıtynda, táýelsiz el bolý táýelsizdikti jarııalaýmen shektelmeıdi. Táýelsizdigin jarııalasa da alpaýyt elderdiń jemsaýynda jutylyp ketken elderdiń tarıhy – sonyń dáleli.
Elbasy Nursultan Nazarbaev kezekti maqalasynda táýelsizdikti jarııalaýǵa daıyndyqtyń qandaı jaǵdaıda júrgizilgeni baıandaldy. Bul derekti Elbasy sózimen sabaqtasaq «Saıasattyń qyzýy kóterilip, Gorbachev pen Elsınniń teketiresi shegine jetip, bir kezderi temirdeı tártipke negizdelgen ortalyqtaǵy basshylyqtan bereke ketken sol tusta Qazaqstan tarapynan jiberilgen jalǵyz qateliktiń ózi orny tolmas tragedııaǵa ákep soqtyrýy ábden múmkin edi. Biz ashýdy aqylǵa, asyǵystyqty sabyrǵa jeńdirip, únemi áliptiń artyn baǵyp, ańysyn ańdýmen boldyq».
Adamdar ǵana emes, qoǵam da tarıhtan tirek izdeıdi. Bul – álemdik tájirıbede bar úrdis. Odan biz de qalys qala almaımyz. Elbasy atap ótkendeı, dana babalarymyz ózin ǵana emes, adal ǵurpyn, darhan kóńilin, taza tilin, ásem áni men qońyr kúıin, máıekti mádenıeti men baı ádebıetin qosa saqtap, urpaǵyna amanattap, búginge jetti. Endi osy qasıetti boryshty keler urpaqqa jetkizý – bizge syn. Demek, táýelsizdik amanatyna adal bolý da bizge syn.
Elbasy Nursultan Nazarbaev táýelsizdik úshin kúres táýelsizdikke deıin emes, táýelsizdikten keıin bastalǵanyn jıi aıtady. Biz muny kúndelikti ómirde óz tájirıbemizden bilemiz. Bızneste tehnologııalyq tizbek degen uǵym bar. Endigi maqsat sol tehnologııalyq tizbekten óz ornymyzdy aıqyndaý. Munyń aıtýǵa ǵana ońaı ekeni belgili.
Bizdiń býyn, ásirese ómirin bıznespen baılanystyrǵan býyn – Táýelsizdiktiń ekonomıkalyq qyryna basymdyq berip, býyny qatqan býyn. Qazir bıznes ókilderine aıtylar syn da, ókpe de kóp. Importtaǵy qazaq taýarlarynyń kemshindigi – bizge qarata aıtylatyn ókpege negiz bolatynyn túsinemin. Meniń bıznestegi dostarymnyń árqaısysy úshin ishki naryqtaǵy qazaqstandyq taýardyń úles salmaǵyn kóbeıtýden artyq maqsat joq. Osy baǵytta jumys júrip jatyr. Investısııanyń tabıǵaty saıası turaqty elderge basymdyq beredi. Halyqaralyq tájirıbede bıliktiń beıbit jaǵdaıda, ózara kelisimimen aýysýy – saıası turaqtylyq kepili. Demek, bıznes ıntegrasııasy úshin saıası turaqtylyqtan artyq eshteńe joq. Bıznestiń tabıǵaty tynyshtyqty qalaıdy.
Elbasy keshegi maqalasynda Qazaqstan tizginin ustaǵan ekinshi tulǵa – Prezıdent Qasym-Jomart Toqaevtyń kezdeısoq usynylmaǵanyn aıtty. «Otyz jylǵa jýyq el basqarǵan kezimde men janyma qanshama azamatty serik etip, kóptegen shákirt tárbıeledim. Solardyń ishinde Úkimet basqarǵan, Birikken Ulttar Uıymy Bas hatshysynyń orynbasary retinde jahandyq saıasatqa jetiktigin tanytqan, táýelsizdiktiń alǵashqy jyldarynan bastap qasymnan tabylǵan naǵyz patrıot, joǵary bilikti kásipqoı tulǵa Qasym-Jomart Kemeluly Toqaevty Prezıdenttik qyzmetke usyndym. Saılaýda halyqtyń basym kópshiligi ony qoldady. Osylaısha, biz halqymyzdyń aýyzbirligin, saıasattaǵy sabaqtastyǵymyzdy kúlli álem qoǵamdastyǵyna taǵy bir qyrynan tanyta bildik», dedi Elbasy.
Qazir de Memleket basshysynyń bastamasymen bızneske úlken qoldaýlar kórsetilip, násibin kásipten taýyp júrgen azamattar úshin kóptegen baǵdarlama qolǵa alyndy. Qazir ortasha eseppen 3,5 mln qazaqstandyq bıznes salasynda júr. Bul – 19 mln halqy bar Qazaqstan úshin úlken kúsh.
Mahambet ASABAEV,
kásipker, KazComfort
JShS bas dırektory
