Elbasy «Bolashaq» túlekteri Otanynyń qamqorlyǵyn sezinip, elge qyzmet etip, úmit aqtaıtynyna senim bildirdi. «Bolashaq» halyqaralyq stıpendııasy el Táýelsizdigi arqasynda jastarǵa jasalǵan zor qoldaýy, úlken múmkindigi dep bilemin. Egemendik alǵan eleń-alań tusta, halyq isherge tamaq, kıerge kıim tappaı qınalyp júrgen ýaqytta qarajat bólip, jastardy shetelge bilim alýǵa jiberýi – uzaq merzimge jasalǵan ınvestısııa ekeni anyq. О́ıtkeni qazirgideı dáýirde bilim men ǵylymsyz memleket damýdyń dańǵyl jolyna túse almaıdy. Osylaısha, «Bolashaq» baǵdarlamasy arqyly álemniń mańdaıaldy joǵary oqý oryndarynda bilim alǵan jastar keıinirek Qazaqstannyń halyqaralyq arenada moıyndalýyna mol úles qosty. Bul – birinshiden.
Ekinshiden, baǵdarlama biregeı áleýmettik lıftke aınaldy. «Bolashaq» qarapaıym otbasynan úzdikterdiń ilimin shyńdaýǵa mol múmkindik berdi. Osynaý shırek ǵasyrda kóptegen jas maman álemdegi eń reıtıngi joǵary oqý oryndarynda bilim alýǵa qol jetkizdi. Ásirese, shalǵaı aýyldardan shyqqan bilimdi jastar shartaraptyń úzdik ýnıversıtetterinde ǵylymnyń qyr-syryn úırenip qaıtty.
Osy oraıda, «Bolashaqpen» bilim alǵandar arasynda buqaralyq aqparat quraldary ókilderi de bar ekeni úlken qýanysh. Elbasy aıtqanyndaı-aq, shyn máninde «bul – naǵyz adam kapıtaly». Solardyń qatarynda Ulybrıtanııada bilim alǵanymdy maqtan tutamyn.
Osy oraıda, AQSh-tyń negizin qalaǵandardyń biri, memleket qaıratkeri Benjamın Franklınniń sózi eske túsedi. «Bilimge salynǵan ınvestısııanyń qaıtarymy (ústemeaqysy) árdaıym joǵary bolady», deıdi amerıkalyq dıplomat.
Jalpy, «Bolashaqtyń» el damýyna ákelgen paıdasy ushan-teńiz. Jastarǵa salynǵan ınvestısııanyń qaıtarymy molynan bolǵany, bolashaqtyqtardyń ekonomıkanyń negizgi sektorlaryn ilgeriletýge qomaqty úles qosqany anyq. Sondyqtan atalǵan baǵdarlama – Táýelsiz Qazaqstan ákelgen utymdy sheshimderdiń biri.
Qanat ÁÝESBAI,
«Bolashaq» baǵdarlamasynyń túlegi, jýrnalıst,
QR Prezıdentiniń halyqaralyq «Bolashaq» stıpendııasy stıpendıattary Qaýymdastyǵynyń Keńes múshesi
