Túrkistan oblysy ákiminiń orynbasary Rashıd Aıýpov óńirdegi janarmaı tapshylyǵyn Pavlodar zaýytynyń jóndeý jumystaryna baılanysty ýaqytsha toqtaýymen túsindirdi.
«Búgingi kúni oblysty jalǵyz Shymkenttegi munaı óńdeý zaýyty janarmaımen qamtamasyz etip otyr. Buǵan deıin arzan baǵany ustaý úshin janarmaı temir jol arqyly Pavlodardan jáne Shymkentten tasymaldanatyn. Búgingi kúni «PetroQazaqstannyń» vagondarynda benzın joq. Úlken janarmaı satatyn beketterge óz kompanııalary tikeleı jetkizip jatyr. Al, jeke janarmaı beketteriniń ıeleri joldyń aqyly bolýyna baılanysty tasymaldaýǵa qarsylyq bildirdi. Bul - tikeleı Energetıka mınıstrliginiń jaýapkershiliginde. Biz bul týraly aqparatty berdik. Kelissóz júrgizildi. «Shnos» kompanııasy oblys úshin kóbirek benzın beretin boldy», dedi Rashıd Aıýpov.
Energetıka mınıstrligi men «Shnos» kompanııasy ókilderiniń sózine sensek, eki kún ishinde másele tolyǵymen sheshilýi kerek.
Al, demalysqa deıin shalǵaıda ornalasqan Shardara, Maqtaral aýdandaryna da jetkiziledi. Taǵy bir aıta keterligi, janarmaı tapshylyǵy týyndaǵan tusta keıbir beketter benzın men dızel otynyn qymbattatyp jibergen. Bul baǵytta monıtorıng toby baqylaý júrgizip, isti monopolııaǵa qarsy kúres departamentine ótkizip jatyr.
Búginde janarmaı stansııalary arnaıy talon arqyly birinshi kezekte memlekettik mekeme kólikterin janarmaımen qamtyp otyr.
