Memleketimizdiń astanasyn Almatydan Aqmola qalasyna resmı túrde kóshirý isi 1997 jyldyń 10 jeltoqsanynda júzege asyryldy. Al Tuńǵysh Prezıdenttiń 1998 jylǵy 6 mamyrdaǵy Jarlyǵy negizinde Aqmolanyń ataýy Astana bolyp ózgertilip, onyń halyqaralyq tusaýkeseri 1998 jyldyń 10 maýsymynda ótti. Al 2019 jylǵy 23 naýryzdaǵy Qazaqstan Respýblıkasy Prezıdentiniń Jarlyǵymen Astana qalasy Qazaqstan Respýblıkasynyń astanasy – Nur-Sultan qalasy dep qaıta ataldy. Bul kórsetilgen aıtýly kúnderdiń barlyǵy el tarıhynda altyn árippen jazylyp qaldy. Degenmen, kezinde Almatydan Saryarqaǵa bet túzegen bul kóshtiń resmı turǵyda 10 jeltoqsanda bastalǵanyn eskere sóılesek, bul kúnniń Qazaq eli úshin mańyzy zor ekenin tereń uǵyna túsemiz.
Tarqata aıtar bolsaq, 1997 jyldyń 9 jeltoqsanynda jańa elorda – Aqmolaǵa elimizdiń memlekettik rámizderi jetkizildi, Elbasy Rezıdensııasynda Kók týymyz jelbiredi. Osy kúni Almaty jurtshylyǵynyń, zııaly qaýymnyń ókilderi Qazaqstannyń Tuńǵysh Prezıdenti – Elbasy Nursultan Nazarbaevty jańa astanaǵa shyǵaryp salý rásimin jasady.
Al osy jyldyń 10 jeltoqsanynda astanadaǵy Elbasy Rezıdensııasynyń Kúmbezdi zalynda respýblıka Parlamenti men Úkimetiniń birlesken saltanatty májilisi boldy. Ony kirispe sózben ashqan Qazaqstan Prezıdenti Nursultan Nazarbaev Aqmola qalasy 1997 jylǵy 10 jeltoqsannan bastap memleketimizdiń astanasy bolyp resmı túrde jarııalanatynyn saltanatty jaǵdaıda málimdedi.
Mine, osylaısha elordamyz – Nur-Sultan qalasynyń memleketimizdiń astanasy retindegi alǵashqy resmı qadamy bastaý aldy.
Eldiń jańa ortalyǵy á degennen saıası-ekonomıkalyq, rýhanı-mádenı iri oqıǵalardyń, qaınaǵan tirshiliktiń ordasyna aınalyp shyǵa keldi. Jańa Astana el ortalyǵy bolǵanyna bir jyl óter-ótpes ýaqytta, ıaǵnı 1999 jyly IýNESKO uıǵarymymen «Álem qalasy» degen mártebeli ataqty enshiledi, al 2000 jyly astanalar men iri qalalardyń halyqaralyq assambleıasynyń músheligine qabyldandy. Osylaısha, alǵashqy qadamyn sátti bastaǵan elorda búginde elimizdiń aıbary, mereıi bolyp otyr. Eýrazııa qurlyǵynyń ortasynda ornalasqan Nur-Sultan qalasy elimizdiń tynys-tirshiligin jańa baǵytqa burdy.
Qazaqstannyń, ultymyzdyń brendine aınalǵan Nur-Sultannyń damýy, mol tabystarǵa jetýi, qolaıly orta atanýy, qanatyn keńge jaıýy, bul – halqymyzdyń aq tileginiń oryndalýyn, Elbasy eńbeginiń janǵanyn bildiretini sózsiz.
