Memleket basshysy Qasym-Jomart Toqaev Ulttyq qoǵamdyq senim keńesiniń tórtinshi otyrysynda «oqıtyn ultty» qalyptastyrý úshin jas qazaqstandyqtar arasynda oqý mádenıetin damytýǵa jáne ilgeriletýge erekshe nazar aýdarǵany belgili. Osyǵan baılanysty, «Rýhanı jańǵyrý» baǵdarlamasyn ulttyq jańǵyrý kezeńine kóshirý jónindegi Jol kartasyna sáıkes balalar oqýynyń respýblıkalyq konkýrsy ótkizildi. Baıqaýdyń basty maqsaty – kitap oqýǵa degen qyzyǵýshylyqty qalyptastyrý, óskeleń urpaqqa óz eli úshin maqtanysh sezimin tárbıeleý jáne «Rýhanı jańǵyrý» baǵdarlamasynyń ıdeıalaryn tereń túsiný. Baıqaýǵa Qazaqstannyń barlyq óńirlerindegi 3 600-den astam, jalpy bilim beretin mektepterden 37 myńnan astam orta býyn oqýshylary qatysty. Baıqaý prosesi óńirler ákimdikteriniń, oblystyq, qalalyq, aýdandyq bilim bólimderiniń kómegimen uıymdastyryldy.
Qorytyndy respýblıkalyq kezeńge Qazaqstannyń bes óńirinen 25 bala qatysty. Baıqaý barysynda qatysýshylar týǵan ólkeniń tarıhy, mádenıeti, sondaı-aq «Rýhanı jańǵyrý» baǵdarlamasynyń prınsıpteri boıynsha suraqtarǵa jaýap berip, kvestke qatysty. Nur-Sultanda «Rýhanı jańǵyrý» qazaqstandyq qoǵamdyq damý ınstıtýtynyń keńsesinde respýblıkalyq konkýrstyń jeńimpazdaryn marapattaý rásimi ótti. Is-sharaǵa Aqparat jáne qoǵamdyq damý vıse-mınıstri Bolat Tilepov, «Rýhanı jańǵyrý» KeAQ basqarma tóraǵasy Asylbek Esenbaev, oblys ákimderiniń orynbasarlary, jeńimpaz óńirlerdiń bilim basqarmalarynyń basshylary jáne tikeleı baıqaýǵa qatysýshylar qatysty.
Baıqaýǵa qatysýshylardy quttyqtaı otyryp, B.Tilepov: «Atalǵan baıqaýdyń oqý-tanymdyq bazasy bolyp tabylatyn kitaptar Qazaqstannyń Memlekettik rámizderi, mádenıeti, salt-dástúrleri, tarıhı eskertkishteri, kıeli oryndary týraly baıandaıdy. Ǵasyrlar danalyǵy, halyq maqaldary, mátelder, jumbaqtar túrinde, sondaı-aq taýlar men dalanyń ańyzdary oqýshylardyń oı-órisin keńeıtip, ulttyq kodtyń saqtalýyna yqpal etedi», dedi.
Baıqaý komıssııasynyń sheshimine sáıkes, besinshi oryndy Jezqazǵan qalasynyń «О́rken» mamandandyrylǵan mektep-ınternatynyń oqýshysy Nazym Joltaı ıelendi. Tórtinshi oryndy Aqtóbe oblysy Shalqar aýdany oblystyq mamandandyrylǵan fızıka-matematıka mektep-ınternatynyń oqýshysy Fatıma Mýapykova aldy. Úshinshi orynǵa elordalyq №86 mektep-gımnazııasynyń oqýshysy Eraly Qozy ıe boldy. Ekinshi oryndy Baıqońyr qalasyndaǵy №273 orta mekteptiń oqýshysy Uldaı Qarataeva jeńip aldy.
«Sen týǵan Qazaqstanyńdy bilesiń be?» degen taqyrypta Shyǵys Qazaqstan oblysy Aıagóz aýdany №5 orta mektebiniń oqýshysy Janel Toqanova baıandama jasady. Jeńimpazdar arnaıy gramotalarmen jáne baǵaly syılyqtarmen marapattaldy.
Is-shara sońynda Aqparat jáne qoǵamdyq damý vıse-mınıstri B.Tilepov aýdandar men qalalardyń mektep kitaphanalarynyń jeńimpaz oqýshylaryna kitap oqýǵa degen qyzyǵýshylyǵyn odan ári arttyrý úshin birqatar kórkem kitap túrinde syılyqtar jiberilgenin atap ótti.
