Mınıstr «Qurmet» ordeni, «Eren eńbegi úshin» medali, «Qazaqstannyń eńbek sińirgen qaıratkeri» qurmetti ataqtary, «Qazaqstan Respýblıkasynyń Táýelsizdigine 30 jyl» mereıtoılyq medaldary, «Halyq alǵysy» medaldary, «Aqparat salasynyń úzdigi» tósbelgilerimen marapattady.
Sondaı-aq Qazaqstan Respýblıkasynyń Qurmet gramotalary men QR Premer-Mınıstriniń Qurmet gramotalaryn tabystady. Marapattalǵandardyń arasynda Qazaqstan azamattyq qoǵamynyń kórnekti qaıratkerleri Baný Nurǵazıeva, Aıgúl Soloveva, Marat Bashımov, BAQ-tyń ardagerleri men qyzmetkerleri - Saýyq Jaqan, Maqpal Jumabaı, Sergeı Nesterenko, Marına Saharova jáne basqalar bar.
«Bıylǵy táýelsizdiktiń 30 jyldyǵy – el damýynyń jańa kezeńi. Táýelsizdiktiń bizge qalaı kelgenin, osy jolda halqymyz qandaı qıyndyqtardy kórgenin Elbasymyz keshegi «Táýelsizdik taǵylymy» maqalasynda tamasha jetkizdi. Rasynda, Tuńǵysh Prezıdentimizdiń de, Memleket basshysynyń da aıtqanyndaı, osy 30 jyldyq mereıli belesti elimiz abyroımen baǵyndyryp otyr», dedi A.Balaeva quttyqtaý sózinde.
Mınıstr osy jyldar ishinde memlekettik saıasattyń basty ıdeologııalyq baǵyttaryna - aqparat, azamattyq qoǵamdy damytý, qoǵamdyq kelisimge vedomstvo jetekshilik etetinin atap ótti.
«Men sizderdiń árqaısyńyzǵa kásibı jumysyńyz úshin alǵysymdy bildirgim keledi! Árqaısyńyz ortaq iske baǵa jetpes úles qostyńyzdar», dedi mınıstr.
Belgili qoǵam qaıratkeri Aıgúl Soloveva barsha qazaqstandyqtardy quttyqtap, Mınıstrliktiń elimizdiń turaqty damýyna zor úles qosqanyn jáne Mınıstrliktiń ataýyndaǵy «damý» negizgi sózi ádil kórinis tapqanyn atap ótip, árqashanda osy vektordy ustanýǵa tilek bildirdi.
«Mınıstrlik bul baǵytta mańyzdy ári tıimdi jumys atqardy jáne qoǵam ókilderimen dıalogtyń ónimdi formatyn qalyptastyrdy», dedi A.Soloveva.
О́z kezeginde, «Qazaqstannyń eńbek sińirgen qaıratkeri» ataǵymen marapattalǵan «Qazaq radıosynyń» ardageri Saýyq Jaqan ata-babalar armandaǵan baqytty ýaqytta ómir súrip jatqanymyzdy atap ótti. Ol Táýelsizdiktiń 30 jyldyq mereıtoıy «Qazaq radıosynyń» 100 jyldyǵymen tuspa-tus kelgenin jáne aýqymdy jumystyń nátıjelerin, memleket tarapynan radıohabar taratý salasyna shynaıy qamqorlyqty sezinetinin aıtty.
Qazaqstannyń Azamattyq alıansynyń prezıdenti B.Nurǵazıeva «Qazaqstan Respýblıkasynyń Táýelsizdigine 30 jyl» medalin tabystaý kezinde elimizdiń barlyq óńirleriniń úkimettik emes uıymdaryn biriktiretin barsha Azamattyq Alıanstyń eńbegin baǵalaý retinde qabyldaıtynyn atap ótti.
Saltanatty is-shara barysynda Memleket basshysy Qasym-Jomart Toqaevtyń tapsyrmasy boıynsha Mınıstrlik Táýelsizdiktiń 30 jyldyǵy jylynda atqarǵan jumysy týraly beınerolık kórsetildi.
