Aqparat jáne qoǵamdyq damý mınıstrliginiń qoldaýymen Táýelsizdiktiń 30 jyldyǵyna oraı 3 myń qazaqstandyqtyń qatysýymen Memlekettik ánuranǵa beınebaıandy «Qazaqstan» teleradıokorporasııasy túsirdi. Joba Qazaqstan azamattarynyń patrıottyq sezimin kóterip, el men jerge súıispenshiligin arttyrý maqsatynda qolǵa alyndy.
Beınebaıanǵa QR Ulttyq qaýipsizdik komıteti Shekara qyzmeti jáne QR Ulttyq Ulanynyń 180 sarbazy, «Astana Opera» memlekettik opera jáne balet teatry men Nur-Sultan qalasy ákimdigi Memlekettik akademııalyq fılarmonııasynyń 120 ártisi, «Qazaqstan» teleradıokorporasııasynyń 150 qyzmetkeri jáne óńir jastary, stýdentter, sala mamandary men qarapaıym el turǵyndary qatysty.
Túsirilim jumystary Nur-Sultan, Almaty, Aqtaý, rýhanı astana-Túrkistan qalalarynda júrgizilip, negizgi kóriniske elordadaǵy «Qazaq Eli» monýmenti, «Astana Opera» memlekettik opera jáne balet teatry, Qazaqstan Respýblıkasynyń Ulttyq mýzeıi, «Qazmedıa» ortalyǵy» teleradıokesheni, Almatydaǵy Respýblıka alańy, Ál-Farabı atyndaǵy Qazaq Ulttyq ýnıversıteti, «Kóktóbe» demalys kesheni, Túrkistandaǵy «Kerýen saraı» týrıstik kesheni, Qoja Ahmet Iаsaýı qoryq-murajaıy, Kaspıı teńizi men Almaty oblysynyń Sharyn shatqaly, Aqmola oblysyndaǵy Býrabaı ulttyq parki jáne Mańǵystaý oblysynyń Aqespe taýy alyndy.
Ánurandy el turǵyndarymen birge opera jáne estrada ánshileri S.Baıǵojın, A. Jyltyrkózov. J. Shybyqbaev, N.Úsenbaeva, E. Vısınskaıa, T. Zabırova, A. Balajanova, M. Salyqov, K. Tólenbaeva, O. Altynbekov, B. Qılymhan, M. Anarbek, E. Narımanuly oryndady.
Sonymen birge beınebaıanǵa QR Syrtqy ister mınıstrligimen birlese AQSh, Túrkııa, Reseı, Qytaı elinde qyzmet etip jáne bilim alyp júrgen el azamattary men osy elderdegi qandastar toptastyryldy. «Qazaqstan» teleradıokorporasııasy beınebaıan túsirilimine qoldaý kórsetkeni úshin elimizdiń Syrtqy ister mınıstrligine alǵys bildiredi.
Beınebaıan «Qazaqstan», «Abai tv», «Balapan», «Qazsport» telearnalary men 14 aımaqtyq arna efırinen 15 jeltoqsannan bastap kún saıyn kórsetiledi.
