Kezdesýdiń negizgi maqsaty – ótken jarty jyldyqtaǵy birlesken jumystyń qorytyndysyn shyǵarý jáne eki el arasyndaǵy strategııalyq seriktestikti odan ári keńeıtý múmkindikterin aıqyndaý boldy.
Is-sharanyń kún tártibinde ekijaqty qarym-qatynastardyń saıası, saýda-ekonomıkalyq jáne ınvestısııalyq, mádenı-gýmanıtarlyq, ǵylymı-tehnıkalyq salalardaǵy keń aýqymdy ózekti máseleleri, sondaı-aq adam quqyqtary, adam saýdasy jáne t. b. máseleler qamtyldy. Komıssııa otyrysynyń qorytyndysy boıynsha Birlesken málimdeme qabyldandy.
«Biz keńeıtilgen strategııalyq seriktestigimizdi dostyq, ózara qurmet jáne senim rýhynda odan ári tereńdetýge nıettimiz», dedi A. Rahmetýllın óz sózinde.
AQSh delegasııasynyń Nur-Sultanǵa sapary sheńberinde Qazaqstan Respýblıkasy Premer-Mınıstriniń orynbasary – Syrtqy ister mınıstri Muhtar Tileýberdi amerıkalyq qonaqty qabyldap, ekijaqty kún tártibindegi mańyzdy máselelerdi talqylady. Kelissózder barysynda D. Lý Qazaqstannyń Táýelsizdik kúnimen quttyqtady. Amerıkalyq dıplomat Vashıngton Nur-Sultanmen keńeıtilgen strategııalyq seriktestikti joǵary baǵalaıtynyn jáne Qazaqstanmen de, jalpy Ortalyq Azııa óńirimen de berik, ári turaqty qarym-qatynastardy saqtaýǵa nıetti ekenin atap ótti.
