Qazirgi tańda Mınıstrler kabıneti quramynda 16 mınıstr bar. Bir qyzyǵy, sonyń teń jartysy áıel. Qyrkúıekte ótken saılaýda jeńiske jetken SDP atynan 7 mınıstr taǵaıyndalsa, 5 laýazym «Jasyldar» partııasyna buıyrdy. Erkin demokrattar (FDP) atynan 4 mınıstr bekitildi.
Esterińizde bolsa, qyrkúıekte Germanııada parlamenttik saılaý ótken bolatyn. Daýys sanaý nátıjesi boıynsha solshyl baǵyttaǵy Sosıal-demokratııalyq partııa (SDP) jeńiske jetti. Buǵan deıin bılikte basym daýysqa ıe bolyp kelgen Hrıstıan-demokratııalyq odaǵy (CDU) ekinshi orynǵa turaqtady.
Sosıal-demokrattarǵa elektorattyń 25,7 paıyzy daýys berdi. Ekinshi oryndaǵy Hrıstıan-demokratııalyq partııasyn halyqtyń 24,1 paıyzy qoldaǵan. Osylaısha, 16 jyl boıy Býndestagta kópshilik mandatty ıelenip kelgen CDU jeńiliske ushyrady.
Úshinshi oryn «Jasyldar» partııasyna buıyrdy. Olardyń enshisine bıýlletenderdiń 14,8 paıyzy tıesili. Buǵan deıingi saılaýǵa qaraǵanda, atalǵan partııa kóbirek daýys jınady. Sóıtip Býndestagtaǵy mandat sanyn eki esege kóbeıte aldy. Bul nemis halqynyń qorshaǵan ortaǵa alańdaı bastaǵanyn kórsetedi.
Sonymen úsh aıǵa sozylǵan kelissózder nátıjesinde kansler saılanyp, mınıstrler kabıneti bekitildi. Osylaısha, Olaf Shols bastaǵan saıasatkerler aldaǵy ýaqytta Germanııany alǵa jeteleı bermek.
Ol buǵan deıin Gambýrgtiń meri qyzmetin atqardy. Sondaı-aq Merkel úkimeti kezinde qarjy mınıstri bolyp eńbek etti. Ekeýi eki partııanyń ókili ekenine qaramastan, O.Shols qyzmet jolynda Merkeldiń kóshbasshylyq stılin boıyna sińirdi desek artyq aıtqandyq emes. Ol óz isin jetik biletin qarapaıym pragmatık retinde tanyldy.
O.Shols myrza A.Merkeldiń shyn izbasary ekenin marapattaý rásiminde sóılegen sózinde anyq ańǵartty. Ol óziniń de, A.Merkeldiń de Germanııanyń soltústiginen ekenin atap ótti. Jańa kanslerdiń buǵan ekpin berýiniń syry mynada. Ádette Germanııanyń soltústigin mekendegender ońtústiktegi otandastaryna qaraǵanda minezi birkelki ekeni belgili. «Men osy ýaqytqa deıin baǵytymyzdy aıqyndaǵan soltústik-shyǵys nemis mentalıtetin jalǵastyrǵym keledi. Saıasatymyzda kóp ózgeris bolmaıdy», dedi O.Shols. Ol sondaı-aq qyzmette bolǵan kezinde kóptegen iri daǵdarysty eńsergen A.Merkelge qurmetin jetkizdi.
Prezıdenttiń Bellevıý saraıyndaǵy rezıdensııasynda ótken saltanatty is-sharada Germanııa basshysy Frank-Valter Shtaınmaıer jańa mınıstrlerge alda qıyn mindet kútip turǵanyn jetkizdi. «Sizder qazir elimiz úshin jáne 82 mıllıonnan astam turǵynnyń jaýapkershiligin moıyndaryńyzǵa alasyzdar. Saılaýda jaýapkershilikti basym baǵyt etip belgiledińiz. Osyndaı mindetterińiz qıyn ýaqytqa tap keldi. Parlamenttegi koalısııa kóp progreske, kóp reformaǵa jáne kóp ózgeristerge jetýge nıetti ekenin qoldaımyn.
Kúmánsiz, Germanııa klımattyń ózgerýi nemese sıfrlandyrý, halyqaralyq báseke nemese kóshi-qon sııaqty úlken qıyndyqtarmen betpe-bet kelip otyr. Sizderdiń aldaǵy ýaqytta atqaratyn jumystaryńyz elimizdiń bolashaq kelbetin qalyptastyrady», dedi F.Shtaınmaıer.
Is-sharadan keıin Germanııa Mınıstrler kabınetiniń músheleri bekitildi. Vıse-kansler ári Ekonomıka jáne qorshaǵan ortany qorǵaý mınıstri bolyp «Jasyldar» partııasynyń ókili Robert Habek taǵaıyndaldy. Atalǵan partııanyń jetekshisi Annalena Berbok endigi jerde Syrtqy ister mınıstri qyzmetin atqarady. Erkin demokrattar partııasynyń jetekshisi Krıstıan Lındner Qarjy mınıstri boldy.
