3 qarashada polıseıler Altaı aýdanynda aıý aýlaǵan bir azamatty anyqtasa, 6 qarasha kúni Glýbokoe aýdanynyń Tarhanka aýylynda aıý atyp alǵan taǵy bir kúdiktini qolǵa túsirgen. Qysqy uıqyǵa qamdanǵan qońyr qońdanyp, terisi jyltyraǵan soń brakonerler qyzyǵatyn da shyǵar, kim bilsin.
Altaı aýdanynyń 45 jastaǵy turǵyny Tursuǵyn aýylynyń mańynda taǵynyń izine tuzaq qurǵan. Aıýdyń etin azyq etip, terisin satý úshin aýlaǵan kórinedi. Polısııa departamentiniń bastyǵy Saǵat Madıevtiń aıtýynsha, atalǵan fakti boıynsha Qylmystyq kodekstiń 337-baby, ıaǵnı zańsyz ań aýlaý boıynsha sotqa deıingi tergeý bastalǵan. Keltirilgen shyǵyn somasy anyqtalyp jatyr. Tergeý-tekserý jumystary aıaqtalǵan soń kúdikti azamat úsh jylǵa bas bostandyǵynan aıyrylýy múmkin.
Izinshe, 6 qarashada polısııa qyzmetkerleri Tarhanka aýylynyń mańynda óziniń tirkelgen myltyǵymen aıý atqan О́skemen qalasynyń 51 jastaǵy turǵyny anyqtaldy. Kúdiktiniń aıtýynsha, aıýdy etin satý maqsatynda atqan eken. Sondaı-aq maımaqtyń tabanyn da saqtap qoıǵan.
Aıtylǵandaı, Tarhanka tóńireginde aıý atqan azamat ta úsh jylǵa bas bostandyǵynan aıyrylýy múmkin. Jalpy, jedel aldyn alý is-sharasy kezinde 360-tan astam reıdtik shara ótkizilip, 605 tabıǵatty qorǵaý zańnamasy buzylǵan. Onyń 394-i ań aýlaýǵa qatysty. Sonymen qatar 10 brakoner anyqtalyp, olarǵa qatysty qylmystyq is qozǵaldy. Iá, tabıǵatqa, janýarlar dúnıesine zalal keltirgenderge jaza qatań. Jazadan buryn árkim týǵan jerine, ósken ortasyna qurmetpen qaraýy kerek shyǵar. Jedel aldyn alý sharasy aıaqtalǵanymen, tabıǵatty qorǵaý jumystary jalǵasa bermek.
Shyǵys Qazaqstan oblysy
