Jeńiske jetken nurotandyqtardyń 47%-y – jańa tulǵalar, onyń ishinde bilim berý salasynyń ókilderi, kásipkerler, fermerler bar. Ortasha jasy – 46 jas. Áıelder – 10%, 35 jasqa deıingi jastar sany – 18%. Kópshiligi bastaýysh partııa uıymdarynyń tóraǵalary, partııaishilik praımerızdiń qatysýshylary.
«2021 jylǵy 25 shildede Memleket basshysynyń bastamasy boıynsha ótken aýyl ákimderin tikeleı saılaý partııalardyń jergilikti jerlerde halyqpen qoıan-qoltyq jumys isteýine júıeli serpin berdi. Básekeli kúres nátıjesinde nurotandyqtar saılaý okrýgteriniń basym kópshiliginde jeńiske jetti. Sonymen birge ózin ózi usynǵandar jáne basqa 5 partııanyń ókilderi de ákim bolyp saılandy. Osylaısha, barlyq deńgeılerde proporsıonaldy saılaý júıesine kóshý partııalardyń ınstıtýsıonaldyq mańyzy men rólin nyǵaıtty. Keń turǵydan alǵanda, bul saılaý azamattardyń sheshimder qabyldaý prosesine qatysýyn jandandyrýǵa, sondaı-aq esep beretin memleketti qalyptastyrýǵa baǵyttalǵan, Elbasy usynǵan 5 ınstıtýsıonaldy reformanyń naqty iske asyrylýyn rastady», dep atap ótti bıleýshi partııa Tóraǵasynyń birinshi orynbasary Baýyrjan Baıbek buǵan deıingi óziniń «Partııalyq júıe – memlekettiliktiń ınstıtýsıonaldyq tiregi» atty maqalasynda.
Eske sala keteıik, bıyl aýyl ákimderiniń alǵashqy tikeleı saılaýy 864 aýyldyq okrýgte ótti. Onyń ishinde 730 ákim 25 shildede, taǵy 134 ákim tamyz – jeltoqsan aılary aralyǵynda saılandy.
«Aq jol» demokratııalyq partııasy, Qazaqstannyń halyq partııasy, Adal, «Aýyl» jáne Jalpyulttyq sosıal-demokratııalyq partııalarynyń kandıdattary aýyldyq okrýgterdiń 8,5%-ynda jeńiske jetti. Aýyldyq okrýgterdiń 4%-ynda birde-bir partııanyń ókili bolyp tabylmaıtyn ózin ózi usynǵan úmitkerler saılandy.
Nur Otan-nyń barlyq kandıdattary partııanyń Saıası menedjment mektebi bazasynda semınarlardan ótip, qajetti uıymdastyrýshylyq, ádisnamalyq jáne basqa da qoldaýmen qamtamasyz etildi. Árqaısysynyń óz saılaýaldy baǵdarlamasy bar, ol partııanyń qoldaýymen aýmaqtardyń múmkindikterin eskere otyryp, tıisti resýrstarmen qamtamasyz etilgen.
