Nur Otan partııasy Saıası keńesiniń keńeıtilgen otyrysy barysynda Qazaqstannyń Tuńǵysh Prezıdenti – Elbasy Nursultan Nazarbaev qazaqstandyqtar úshin negizgi baǵdar bolatyn «Eldiktiń jeti tuǵyry» qaǵıdattarynyń jıyntyǵyn usynǵan bolatyn. Atalǵan taqyrypqa baılanysty uıymdastyrylǵan dóńgelek ústeldiń moderatory Qazaqstan Team respýblıkalyq jastar uıymynyń jetekshisi Oljas Súleımenov boldy.
Spıkerler retinde Prezıdent janyndaǵy Jastar saıasaty jónindegi keńestiń múshesi Ýálıhan Bahretdınov, QHA keńesiniń múshesi, «Assambleıa jastary» RQB tóraǵasy Tımýr Jumyrbaev, Nur-Sultan qalasynyń WT taekvondo federasııasynyń vıse-prezıdenti Aral Sadyqov, Munarat mektepke deıingi bilim berý jobasynyń negizin qalaýshy Erkebulan Amantaev, «Qara Shańyraq» RQB jetekshisi Baıan Ahataı, sabaq.online platformasynyń dırektory Bógenbaı Serikbaı qatysty.
A.Sadyqovtyń pikirinshe, sport «Eldiktiń jeti tuǵyry» qaǵıdatyndaǵy óte mańyzdy sala, óıtkeni salamatty ómir salty – ult densaýlyǵynyń kepili. О́z sózinde B.Ahataı «Qoǵamnyń barlyq salasynyń bastaýynda tunyq tárbıe – mádenıet turǵanda ǵana qoǵamnyń kóshi túzeledi. Al tárbıe tal besikten ekenin eskersek, kóp qulypty ashatyn bir kilt analardyń qolynda. Sondyqtan analardyń tárbıesi men bilimi, mádenıeti ushtasqanda ǵana sanaly bala, sapaly urpaq qalyptastyra alamyz», dedi.
«Mektepke deıingi bilim berý júıesiniń damýy, otbasy men salt-dástúr qundylyqtarynyń bastapqy qadamy bolyp tabylady», dedi E.Amantaev.
«Táýelsizdiktiń 30 jyldyǵy qarsańynda Qazaqstannyń jastary aldynda Qazaqstannyń irgesin nyǵaıtý ári damytý mindeti tur. Bul bıik muratty túsiný jáne onyń oryndalýyna kúsh-jigerin qosý óskeleń urpaqtyń basty tarıhı jáne saıası jaýapkershiligi», dedi Ý.Bahretdınov.
«Biz elimizdiń odan ári damýyna úles qosýǵa tyrysamyz. Al «Eldiktiń jeti tuǵyrynyń» mańyzdylyǵyn jastarǵa jetkizý – bizdiń paryzymyz. Elbasy óz úndeýinde bizge, keleshek urpaqqa, jastarymyzǵa osyndaı jaýapty mıssııany júktegenine óte qýanyshtymyn. Qazaqstan Team talanttardy anyqtaý alańy bolyp, sol arqyly jastar saıasatyn kúsheıtedi dep senemiz», dep túıindedi Oljas Súleımenov.
Aıta keteıik, Qazaqstan Team birlestiginiń negizgi maqsaty – jastardyń volonterlik qyzmetin tanymal etý, uıymdastyrý jáne úılestirý.
