Veloklýbpen eki maýsymǵa kelisimshart jasaǵan Nurbergen velosporttan 23 jasqa deıingiler arasyndaǵy toptyq saıys boıynsha qazirgi Qazaqstan chempıony sanalady. Sondaı-aq ol eýropalyq bedeldi jarystarda jasóspirimder jáne jastar deńgeıinde aıtarlyqtaı tájirıbe jınaqtap úlgergen. Jasóspirimder men jastar arasyndaǵy álem chempıonatynda, jastar arasyndaǵy «Djıro d’Italııada» jáne bedeldi «Týr de l’Avenır» velojarystarynda óner kórsetti. Osyndaı basty nátıjesiniń arqasynda Astana Qazaqstan Team basshylarynyń kózine túsip, komandaǵa shaqyrtý aldy.
«Astana Qazaqstan Team veloklýbynda óner kórsetý týraly usynys men úshin kútpegen jaǵdaı boldy. Álem chempıonatynan keıin Federasııa prezıdenti Nurlan Smaǵulov pen komandanyń bas menedjeri Aleksandr Vınokýrov habarlasyp, maǵan klýb sapynda óner kórsetýge múmkindik bergisi keletinderin aıtqanda aıtarǵa sóz tappaı qaldym. Bir jaǵynan óte qatty qobaljyp ári qatty qýandym. Osy usynystan keıin úsh kún uıyqtaı almadym desem de bolady. Sebebi neshe túrli oı mazalady. Senimdi aqtaı almasam qalaı bolady, velosport álemin túgel tanyǵan ataqty sportshylarmen bir pelotonda bolýdyń ózi men sııaqty sportshylar úshin úlken jetistik qoı. Biraq sol múmkindikti abyroımen paıdalana alamyn ba degen oı mazalady. Álem chempıonatynda biz Fransııa quramasymen bir qonaqúıde boldyq. Sol kezdegi álem chempıony Jıýlıan Alafılıpptiń ózin kórgendegi kóńil kúıim bul jerde túkke turmaı qaldy. Nur-Sultan qalasynda ótken tusaýkeserde alǵash ret Astana Qazaqstan Team jeıdesin kıdim, komandalastarymmen jaqynyraq tanystym. Nıbalı, Lopes sııaqty maıtalmandarmen bir sapta turdym. Áli de qobaljý bar, qorqynysh ta bar. Biraq qazirgi bar oıym el senimin aqtaý, bapkerler seniminen shyǵý. Ol úshin aıanyp qalmaımyn», deıdi Nurbergen.
Nurbergen bıyl Qazaqstan chempıonatynyń toptyq jarysynda márege birinshi keldi. Jasóspirimder arasyndaǵy el chempıonatynda júldeli oryndardy ıelenip, «Baltık-Karkonoshe» týrynyń kezeńdik jarysynda (2019 j.) 4-nátıje, «Týr de DMZ» jarysynda (2017 j.) jalpy esepte 9-nátıje kórsetti.
«Men – Taraz qalasynyń týmasymyn. Bala kezimnen júzý sportymen aınalyssam da, velosport jarystaryn úzbeı qaraıtynmyn. Ásirese jaz maýsymynda áıgili «Týr de Frans» dodasynyń birde-bir kezeńin jibermeıtinmin. «Astana» jazýy bar jeıdeni kıgen Vınokýrov, Fofonovtyń ónerine tánti boldym, qatty qyzyǵatynmyn. Aǵam ekeýmiz baratyn júzý basseıniniń janynda velosport seksııasy jumys isteıtin. Bir kúni jattyǵýdan shyǵyp kele jatsam, seksııa aldyna velosıpedterdi tizip qoıypty, shydamaı ishke kirdim. Qyzmetker mehanık eken, maǵan «erteń tańerteń segizde kel» dedi. Sol kúnnen bastap velosıped senimdi serigime aınaldy. Maǵan qatty unady. Al jarystarǵa qatysyp, júldeli oryndardan kórine bastaǵanda tańdaýym durys bolǵanyn túsindim. Sóıtip aldyma belgili bir jetistikke jetýim kerek degen maqsat qoıdym. Qazir jasym 21-de, velosıpedti tizgindegenime 10 jyldan asty. El ishindegi jarystarǵa Jambyl oblysy quramasymen shyǵamyn», deıdi jas shabandoz.
Nurbergen klassıkalyq jáne dóń joldarda ótetin jarystarǵa mashyqtanǵan. Onyń keler maýsymda qaı jarysqa qatysatyny Ispanııada ótip jatqan komandanyń jattyǵý jıynynan keıin belgili bolady. Sporttyq mansabynda úlken qadam jasaǵan jas shabandozdyń kóńili qobaljyp, erekshe tolqýly. Onysy túsinikti de. Álemdik týrǵa Astana komandasymen barý bala kúngi armany. Budan bólek Álemdik týr deńgeıi joǵary, erekshe daıyndyq pen tabandylyqty talap etedi.
«Basty jankúıerim – ákem. Maǵan qoldaý kórsetýden esh jalyqqan emes. Árıne bul sporttyń ózindik qıyndyqtary bar ekenin, jaraqaty kóp ekenin ol da, men de jaqsy túsindik. Otbasymyzda jalǵyz ulmyn. Biraq meniń tańdaýym velosport bolǵanyna qarsylyǵyn bildirgen joq. Buǵanamdy syndyryp alǵanda, operasııa jasaldy. Ákem osyndaı sátterde qasymda bolady. Jarys qaı qalada bolsyn, jankúıerler arasynan tabasyń. Sondyqtan jarystan tys ýaqytta úıde bolyp, anama, ákeme kóńil bólýge tyrysamyn», dep sózin túıindedi Nurbergen.
Tarazdyq sportshy osyndaı múmkindik bergen Aleksandr Vınokýrov pen Velosport federasııasynyń prezıdenti Nurlan Smaǵulovqa alǵysyn bildirdi. Alǵashqy bapkeri Vıacheslav Nepomnıashıh pen Aleksandr Shýshemoın basqaratyn Vino – Astana Motors komandasynyń bapkerler shtabynyń tárbıesine de dán rıza. Bir qyzyǵy, fransýzdar, sheteldik mamandar onyń esimin aına qatesiz aıtady eken. Muny men jaqsylyqqa jorydym, deıdi sportshy.
