Memlekettiń qosymsha qun salyǵy somasyn qaıtarýy – Qazaqstandaǵy ǵana emes, álemdegi salyqtyq ákimshilendirýdiń eń ózekti máseleleriniń biri. Memleket úshin taýar, jumys, kórsetiletin qyzmetterdiń naqty qozǵalysyn baqylaý, sonymen birge ár kezeńde tólengen qosymsha qun salyǵyn eseptep otyrý óte qıyn. Salyq tóleýden jaltarýdyń túrli shemasy men ózge de tásilderiniń saldarynan qosymsha qun salyǵyn negizsiz óteý táýekelderin týdyryp, bıýdjetke shyǵyn ákeledi.
– Otandyq salyq tóleýshiler úshin qoldanystaǵy tártip qosymsha qun salyǵy somasyn qaıtarý is-sharalary merzimderiniń negizsiz sozylýyna, qaıtarýǵa jatatyn qosymsha qun salyǵynyń eleýli bóliginiń joǵalýyna, ózge de salyqtyq táýekelderdiń týyndaýyna ákep soqtyrady, – deıdi «Atameken» ulttyq kásipkerler palatasy basqarma tóraǵasynyń keńesshisi Ekaterına Nıkıtınskaıa.
Búginde qanatqaqty joba aıasynda qatysýshylar qosymsha qun salyǵy somasynyń jyldam qaıtarylýyna múmkindik aldy. Sondaı-aq salyq organdary qandaı da bir ákimshilik jáne ekonomıkalyq sanksııalardy qoldanbaı jetkizýshilermen «salyqtyq alshaqtyqtardy» derbes retteý quqyǵyna ıe boldy. Tizbekter boıynsha oryn alǵan salyqtyq buzýshylyqtar týraly aqparat kameraldyq baqylaý sheńberinde Memlekettik kirister komıtetine usynylýy tıis.
– Jobaǵa memorandým jasasqan astyq naryǵynyń qatysýshylary tartylady. Olar memlekettik kirister organdarynyń salyqtyq qupııany quraıtyn «salyqtyq alshaqtyqtar» boıynsha málimetterdi jarııa etý, taratý jáne úshinshi tulǵalarǵa berýine jazbasha ruqsat beredi. Kásipkerler úshin jobanyń salyqtyq ákimshilik is-qımyldardyń ashyqtyǵyn qamtamasyz etýge arnalǵany óte mańyzdy. Salyq somasyn qaıtarý kóshpeli tekserýlersiz kameraldyq baqylaý rejiminde júzege asyrylady jáne bıznestiń ózin ózi retteý qaǵıdattaryna kóshýine múmkindik beredi, – deıdi Qazaqstan Astyq odaǵynyń tóraǵasy Nurlan Ospanov.
Memorandým agroónerkásipke jáne sabaqtas salalarǵa iskerlik aınalymnyń ashyq tájirıbelerin engizý, básekelestikti damytý, naryqtyń ózin ózi retteýdiń tıimdiligin qamtamasyz etý, bıznes pen memlekettik qurylymnyń dıalog qurýyn kózdeıdi.
Qosymsha qun salyǵyn ońaı tártippen qaıtarý úshin qatysýshylar eki nusqanyń birin tańdaı alady. Birinshi nusqa boıynsha bank kepildigi bolǵan jaǵdaıda 15 jumys kúni ishinde qosymsha qun salyǵy qaıtarylady. Ekinshi nusqa boıynsha kameraldyq baqylaý rásimderi aıaqtalǵannan keıin birden satyp alýshy men ónim berýshi arasyndaǵy «salyqtyq alshaqtyqtar» joq nemese joıylǵan kezeńde qosymsha qun salyǵyn qaıtarýdy usyný josparlanǵan.
Eske sala keteıik, 2019 jylǵy qazanda Qarjy mınıstrligi jáne «Atameken» ulttyq kásipkerler palatasynyń bastamasymen tájirıbe almasý maqsatynda Nur-Sultanda Reseıdiń Federaldy salyq qyzmeti jáne Agroónerkásip hartııasy ókilderiniń sapary uıymdastyryldy. «Atameken» júrgizgen talqylaýlar men konsýltasııalar nátıjesinde Qazaqstannyń Astyq odaǵy jáne Memlekettik kirister komıteti birlesip, agroónerkásiptegi qosymsha qun salyǵynyń artylǵan somasyn ońaılatylǵan jolmen qaıtarý boıynsha qanatqaqty jobany iske asyrý boıynsha jumysty bastady. Bul rette bizdiń mamandar Reseıde tórt jyldan beri jumys istep kele jatqan Hartııa tıpi boıynsha adal salyq tóleýshilerdi ashyq aqparattandyrý júıesine erekshe qyzyǵýshylyq tanytty. Reseıde alǵashqy Hartııa 2017 jylǵy mamyrda agroónerkásip salasynda qurylǵan jáne onyń tájirıbesi qazirgi ýaqytta naryqtyń basqa segmentterine sátti taralýda.
