Qasym-Jomart Toqaevqa memlekettik basqarý júıesin jetildirý maqsatymen júzege asyrylyp jatqan sıfrlyq transformasııa jumystarynyń barysy jáne mınıstrliktiń bıylǵy qyzmetiniń qorytyndylary týraly esep berildi.
Prezıdentke memlekettik qyzmet usyný fýnksııasynyń bıznes-prosesterine qatysty reınjınırıngteý jumystarynyń aralyq nátıjeleri, sybaılas jemqorlyqqa qarsy is-qımyldaǵy sıfrlandyrýdyń róli jóninde baıandaldy. Azamattardyń naqty tirshilik jaǵdaıyna qatysty 110 bıznes-prosess qaıta qaraldy. Atap aıtqanda, júrgizýshi kýáligin shyǵarý, múgedektikti anyqtaý jáne járdemaqylardy esepteýdi jedeldetý, sondaı-aq aýyl sharýashylyǵy salasynda sýbsıdııa alý úshin jańa ádister engizý prosesin transformasııalaý tájirıbesi usynyldy
Qasym-Jomart Toqaev sıfrly vıse-mınıstrlerge arnalǵan KPI men olardyń jumystaryna beriletin baǵaǵa qatysty krıterıılerdi, sondaı-aq 2022 jyldan bastap barlyq memlekettik qyzmetshilerge sıfrlyq quziretterdi oqytý jónindegi vedomstvonyń bastamasyn qoldady. Sonymen qatar Prezıdent sıfrlyq transformasııanyń tabysty bolýy úshin árbir qyzmetshi sıfrlyq daǵdylardyń qajetti kólemin bilýge tıis ekenin atap ótti.
Bıyl vedomstvo tekserýler sanyn 500 paıyzǵa kóbeıtti. Sonyń nátıjesinde baılanys sapasynyń ólshemderin saqtamaǵany úshin operatorlarǵa aıyppul salynǵan. Qabyldanǵan sharalar 532 aýyldaǵy baılanys sapasyn jaqsartýǵa múmkindik berdi.
«HQKO» mobıldi qosymshasynda beınekonsýltasııa arqyly kórsetiletin memlekettik qyzmetter pılottyq rejımde qoljetimdi. Qazirgi ýaqytta 34 anyqtamanyń sıfrlyq aınalym múmkindigi júzege asyrylǵan. eGov mobile mobıldi qosymshasynda qujattardyń 18 túrin qamtıtyn «Sıfrlyq qujat» servısi iske asyryldy. Búginde bul qyzmetti 6 mıllıon adam paıdalanǵan.
Budan bólek Baǵdat Mýsın Qasym-Jomart Toqaevqa IT jáne ǵarysh salalaryn damytýdyń qazirgi jumystary men jospary jóninde baıandady.
