Qazaqstan • 27 Jeltoqsan, 2021

Sot oryndaýshylarynyń qyzmeti ózgeredi

690 ret kórsetildi

Parlament depýtattary atqarýshylyq is júrgizý jáne sot oryndaýshylarynyń mártebesi týraly zańnamaǵa ózgerister men tolyqtyrýlar engiziletin zań jobasyn ázirledi, dep habarlaıdy Egemen.kz.

Osylaısha, atqarýshylyq is júrgizýge qatysýshylar atqarýshylyq áreketter týraly jáne májbúrlep oryndatý sharalary týraly habardar etiledi.

«Atqarýshylyq qujat dereý oryndalýǵa jatatyn jaǵdaılarda, sondaı-aq múlikke tyıym salynǵan jáne ózge de qamtamasyz etý sharalary qabyldanǵan kezde sot oryndaýshysy atqarýshylyq áreketter jasaýǵa jáne bul týraly atqarýshylyq is júrgizýge qatysýshylarǵa aldyn ala habarlamaı, májbúrlep oryndatý sharalaryn qoldanýǵa quqyly», delingen zań jobasynda.

Bul rette boryshkerdiń jeke qatysýyn talap etetin jaǵdaılarda sot oryndaýshysy ony atqarýshylyq áreketter jasalǵan jerge shaqyrý qaǵazymen shaqyrýǵa quqyly ekendigi kórsetiledi.

Sondaı-aq is júzinde sot oryndaýshylary boryshkerlerdi negizsiz jáne qajettiliksiz ózderine shaqyra alady. Osyǵan baılanysty sot oryndaýshysyna shaqyrýlardy jeke alyp tastaý jáne atqarýshylyq is júrgizý júrgiziletin jerge shaqyrýlardy ǵana qaldyrý jáne shaqyrýlar boryshkerdiń jeke qatysýyn talap etetin jaǵdaılarda ǵana júzege asyrylýy múmkin ekendigi týraly naqtylaý engizý usynylady.

Zańnyń qoldanystaǵy redaksııasynda atqarýshylyq is júrgizýdi qozǵaý aldynda boryshkerde kepildiń bolýyn tekserý jónindegi talap joq.

Is júzinde boryshker atqarýshylyq is júrgizý bastalǵanǵa deıin qaryzdy ótegen jaǵdaılarda atqarýshylyq is júrgizý qozǵalǵan kezde jaǵdaılar jıi týyndaıdy. Osyǵan baılanysty adamnyń atqarýshylyq is júrgizý bastalar aldynda beresheginiń bar-joǵyn tekserýge múmkindik beretin normany engizý usynylady.

Sondaı-aq sot oryndaýshysynyń boryshkerdi úsh jumys kúni ishinde májbúrlep oryndatý sharalary týraly habardar etý mindetin belgileý usynylady.

Budan basqa, sot oryndaýshysynyń barlyq aldyńǵy sot oryndaýshylarynyń qaýlylaryn joıý jónindegi mindetin belgileý usynylady, óıtkeni qazirgi ýaqytta atqarýshylyq is júrgizý boryshty tolyq óteýge baılanysty toqtatylǵan jaǵdaılarda bul mindet joq.

«Bul qaryzdy tolyǵymen tólegen boryshkerdi buryn osy óndirisi bolǵan árbir sot oryndaýshysynan ol shyǵarǵan qaýlynyń kúshin joıýdy suraýǵa májbúr etedi», deıdi qujatty jasaýshylar.

Olar azamattardyń konstıtýsııalyq quqyqtarynyń buzylýyn boldyrmaý úshin sot oryndaýshysynyń májbúrleý sharalaryn qoldaný týraly barlyq qaýlylardy, onyń ishinde aldyńǵy oryndaýshylar shyǵarǵan qaýlylardy dereý joıý mindetin engizý qajet dep sanaıdy.

Zań jobasynyń qujattamasymen myna silteme arqyly tanysýǵa bolady. 

Sońǵy jańalyqtar

Elimizdiń úsh oblysynda tuman túsedi

Aýa raıy • Búgin, 18:17

Uqsas jańalyqtar