Qala basshysy balalar men tárbıeshilerdi kele jatqan Jańa jyl merekesimen quttyqtap, aqjarma tilegin jetkizdi.
Shahar basshysy balalarǵa el Táýelsizdigi týraly áńgimelep, memleketimiz árbir azamattyń bilimdi, salaýatty bolýy úshin barlyq ıgiliktermen qamtyp otyrǵanyn, jańa mektepter, sport jáne oıyn alańshalaryn salyp jatqanyn atap ótti.
«Barlyqtaryńdy Jańa jyl merekesimen quttyqtaımyn! Sender erkin eldiń azamatysyńdar. Táýelsizdik arqyly Otanymyz qýatty elge aınalýda. Elimizdiń jarqyn bolashaǵy ózderińmen baılanysty. Sendermen birge Shymkent qalasy ósip-órkendep keledi. Qalamyzdyń basty baılyǵy – ol turǵyndary. Qalamyzǵa árqashan bilimdi, bilikti mamandar kerek. Sondyqtan jaqsy oqyńdar, talapty bolyńdar. О́mirleriń tabysty bolsyn! Bolashaqtaryń baıandy bolsyn! Jańa jyl árbirińe jaqsylyǵymen kelsin!», dedi M.Áıtenov.
«Jarqyra, jaına, Jańa jyl, – Táýelsiz qazaq elinde» taqyrybynda ótken meıramda barlyq balalarǵa syılyqtar men táttiler úlestirildi. Merekelik kesh ertegi keıipkerlerdiń qoıylymymen jáne ásem áýenmen jalǵasyn tapty.
1957 jyly qurylǵan mekeme 2014 jyly Shymkent qalasy № 4 balalar úıi mekemesi bolyp qaıta tirkeldi. Munda 73 bala memleket qamqorlyǵyna alynyp, tárbıelenýde.
