Quramaǵa myqtylar ǵana qabyldanady

Jastardyń

qarqyny jaqsy

Serbııada ótken álem chempıo­natynyń jeńimpazdary Temirtas Júsipov (48 kg) pen Sáken Bıbo­synov (51 kg), kúmis júldeger Sa­byrhan Mahmud (54 kg) pen Se­rik Temirjanov (57), úzdik úsh­tikten kóringen Abylaıhan Jú­sipov (67) jáne jahan jary­synda mańyzdy kezdesýler ótkizgen As­lanbek Shym­bergenov (71 kg) ulttyq qura­manyń kósh­bas­­shy­lary ekendigi sózsiz. Son­dyqtan atalǵan boks­shylardy álem­dik dodadan keıin Qazaqstan bi­rin­shiligine qatysýdan bosatqan edik. Soǵan qaramastan, alǵashqy kúnderden bastap chem­pıo­nattaǵy jekpe-jek­ter óte tar­tysty ótti. Birinshilikke táji­rıbeli boksshylarmen qatar jastar arasynda úzdik nátıjege qol jetkizgender de qatysty. Osy sátti paıdalanyp, týrnırdi joǵary deńgeıde ótkizgen Qazaqstan boks fe­dera­sııasy basshylyǵyna, jarysty uıymdastyrýǵa qatysqan ár­bir azamatqa alǵys aıtqym ke­ledi.

Fınaldyq aıqastarǵa kelsek, 48 kılo salmaqta jastar ara­synda Azııa jáne álem chempıo­ny Sanjar Tashkenbaı men eresekter arasynda 2020 jylǵy Qazaq­stan chempıony, Azııa chempıo­natynyń fınalısi Danıal Sábıt arasyndaǵy kezdesý óte tartysty ótti. Ekeýi de jeńiske laıyq boks­shylar. Áıtse de jekpe-jekte Sanjar Tashkenbaı 4:1 esebimen jeńiske jetti. Jarystyń «Úzdik boks­shysy» ataǵyna da Sanjar Tashkenbaı ıe boldy.

51 kılo salmaq dárejesindegi Nur­sultan Nýrıddınov pen Damır Ábdiqadyr arasyndaǵy fınaldyq aıqasta báseke kúshti ekenin kórsetti. Nátıjesinde, áskerıler arasynda Reseıde ótken álem chempıo­natynyń fınalısi Damır Áb­diqadyr qarsylasyn 5:0 ese­bimen jeńip, tuńǵysh ret Qa­zaqstan chempıony atandy.

54 kılo salmaqtaǵy Oljas Baı­nııazov pen Talǵat Syrymbetov ara­syndaǵy aıqas birinshi sekýndtan bastap teń dárejede ótti. Oljas ta áskerıler arasynda álem chempıony atanǵan boksshy. Tóreshiler eki raýndta jeńisti Talǵat Syrym­betovke berse, bir raýnd­ta je­ńisti Ol­jas Baınııazovqa berdi. Qo­ry­tyndysynda Talǵat qar­syla­synan 3:2 esebimen basym tústi.

 Orta salmaqta báseke óte joǵary

57 kılo salmaqtaǵy Orazbek Asylqulov pen Aıdos Arapov arasyndaǵy kezdesý de óte tar­tys­ty ótti. Jeńiske eki boks­shy da laıyq edi. Tóreshiler eki raýnd­ta Asylqulovty jeńiske jet­ti dese, bir raýndta Arapovtyń basymdylyǵyn joǵary baǵalady. Qorytyndysynda 3:2 esebimen Asylqulov Qazaqstan chempıo­ny atandy. 60 kılo salmaqta da tájirıbeli boksshylardyń qatary kóp boldy. Fınaldyq aıqasta Ádilet Qurmetov birinshi raýndta jeńiske jetti. Al ekinshi-úshinshi raýndta onyń qarsylasy Vasılıı Samchýk belsendilik tanytty. Úsh raýndtyń qory­tyndysy boıynsha barlyq tó­reshi Samchýkti jeńiske laıyq dep tanydy.

63,5 kılo salmaqta Dilmurat Mıjıtov úzdik atandy. Fınalda ol Abzal Serikten 1-2 raýndtarda 2:3 esebimen jeńilip turǵan. Alaıda jeńilip jatqanyn bilgen Mıjıtov úshinshi raýndta baryn salyp, 5:0 esebin tirkedi. Nátıjesinde, 3:2 esebimen Mı­jı­tov jeńiske jetti. 67 kılo salmaqta Dýlat Bekbaýov Darhan Dúısebaıdy 5:0 esebimen taza jeńip, óziniń myqty ekenin dá­leldedi.

Kishigirim sensasııa tirkeldi

71 kıloda fınalǵa jetken Ermahan Jaqpekov pen Qýan Qýatov ekeýi de tájirıbeli boks­shylar. Tartysty ótken kezdesýde tóreshiler jeńisti birinshi raýndta – Jaqpekovke, ekinshi raýndta – Qýatovqa, al úshinshi raýndta qaıtadan Jaqpekovke berdi. Al 75 kılo salmaqta rıngke shyqqan Nurqanat Raıys pen Aıatýlla Ta­kı­janov arasyndaǵy jekpe-jek joǵary baǵalaýǵa laıyq. Bul synda sál ǵana basym­dyqpen (3:2) Nurqanat Raıys alda boldy.

80 kılo salmaqta fınalǵa deıin jetken Jánibek Qartbaev chem­pıonatta kishigirim sensasııa jasady. Ol týrnır barysynda quramanyń úzdik degen eki boksshysyn jarys jolynan shyǵardy. Alaıda fınalda Nurbek Oralbaıdan 0:5 ese­bimen jeńilis tapty. Aldaǵy ýa­qytta Jánibekti halyqaralyq jarystarǵa qosýǵa ábden bolady. 86 kılo salmaqta Saǵyndyq Toǵambaıǵa teń keler eshkim bol­ǵan joq. Onymen fınalda joly túıisken jas boksshy Mádı Ámi­rov tájirıbeli qarsylaspen judyryqtasýǵa áli daıyn emes ekenin baıqatty.

 Rıngke shyqpaı-aq qola júldeger atandy

92 kılo salmaqta halyq­aralyq dárejedegi sport sheber­leri Aıbek Oralbaı men Abzal Quttybekov arasyndaǵy jekpe-jek óte tartysty ótti. Aıbek byltyrǵy Qazaq­stan chempıonatynda jeńimpaz atan­sa, Abzal qola júldeger ıesi. Bul jekpe-jekte jankúıerlerdiń kóńilinen shyǵatyn soqqylar óte kóp boldy. Birinshi raýndta Aı­bek basymdyq tanytty. Ekin­shi raýndta Abzal tarazy basyn teńestirdi. Sheshýdi ke­zeńde sál ǵana basymdyqpen Aı­­bek jeńiske jetti. 92 kılodan joǵary salmaqta fınalǵa shyq­qan Nurlan Saparbaı men Amanat Sabyrǵalıdyń boks mánerine kóńilimiz tolǵanymen, aldaǵy ýaqytta olardyń sheber­ligin shyńdaý barysynda kóbirek jumys isteýge týra keledi. Eki boks­shy da joǵary deńgeıde óner kór­setkenimen, jetildiretin tus­tary bar. Bul synda Nurlan Sapar­baı basym tústi.

Barlyǵyn qosqanda aldaǵy ýaqytta ulttyq qurama sapyna 52 boksshy shaqyrylady. Keıbir salmaqtardan quramaǵa 2-3 boks­shy ǵana alynady. Mysaly, 92 kıloda bes-aq boksshy óner kór­setti. Arasynda Beksultan Orynbaı rıngke shyqpaı-aq qola júldeger atandy. Olardyń arasynan qalaı biz tórt boksshyny qurama sapyna qosamyz?! Sol sebepti bapkerler alqasy aqyldasa kelip, árbir salmaqta myqty degen boksshylardy qu­ramaǵa shaqyratyn bolady.