– Bul jaǵdaı birinshiden ınternettiń joqtyǵymen baılanysty. Iаǵnı, biz ınkassasııa jasap, bankomattarǵa aqsha sala almaımyz. Qarjylyq qyzmetterdi kórsetetin júıe tolyqtaı jumys istep tur. Eldegi jaǵdaı turaqtanyp, ınternet qosylsa, azamattar tólem kartalaryn da, mobıldi qosymshalardy da esh kedergisiz paıdalana alatyn bolady. Sondaı-aq depozıtterin paıdalanyp, bank, bankomat jáne tólem termınaldary arqyly aqsha aýdara alady. Barshańyzǵa málim, qazirgi tańda elde terrorızmge qarsy operasııalar júrip jatyr. Biz jaǵdaı jaqyn arada turaqtanady degen úmittemiz, sol kezde barlyq bank operasııalary qalpyna keltiriletin bolady, – dedi Berik Sholpanqulov.
Onyń sózinshe, 5 qańtarda barlyq qarjy ınfraqurylymy shtattyq rejımde jumys istedi. Iаǵnı barlyq tólemder óńdelip, qor bırjasynda saýda júrdi.
Búgin terrorızmge qarsy operasııalardyń júzege asyrylýyna baılanysty Qarjy naryǵyn damytý jáne retteý agenttigi men Ulttyq bank birlesip, 6 qańtar, ıaǵnı bir kúnge barlyq qarjy uıymdarynyń jumysyn ýaqytsha toqtatý týraly sheshim qabyldady. Olardyń qataryna halyqtyń jáne qarjy uıymdarynyń qaýipsizdigin sondaı-aq ınfraquralymnyń saqtalýyn qamtamasyz etý úshin ekinshi deńgeıli bankter de engizildi.
– Erteń jáne odan keıingi eki kún qatarynan demalys, sondyqtan qarjy uıymdary osy kúnderi de qyzmet kórsetpeıdi. Internet qosylǵan soń bank operasııalary ekinshi dárejeli bankterdiń mobıldi qosymshalarynda qoljetimdi bolady, – dedi ol.
